അടക്കാകുണ്ട്​ മാഞ്ചോലയില്‍ ഉരുള്‍പൊട്ടി​; കൃഷി നശിച്ചു

കാളികാവ്: ചൊവ്വാഴ്ച രാത്രി മുതല്‍ തുടങ്ങിയ കനത്ത മഴയില്‍ അടക്കാകുണ്ട് മലവാരത്തില്‍ എഴുപതേക്കറിന് സമീപം മാഞ്ചോലയില്‍ ഉരുള്‍പൊട്ടി. 18 എക്കര്‍ ഭാഗത്ത് തട്ടാപറമ്പില്‍ ഗിരിജ, ഗിരീഷ്, സുഭാഷ് എന്നിവരുടെ ആറേക്കര്‍ വരുന്ന കൃഷിയിടത്തില്‍ ബുധനാഴ്ച രാവിലെ 11ഒാടെയാണ് ഉരുള്‍പൊട്ടലുണ്ടായത്. വലിയ ശബ്ദത്തോടെ പാറകള്‍ പൊട്ടി താഴേക്ക് പതിക്കുകയും മലവെള്ളപ്പാച്ചിലുണ്ടാവുകയും ചെയ്തു. ഗിരിജ, ഗിരീഷ് എന്നിവരുടെ ഒന്നരേയക്കറോളം കൃഷി നശിച്ചു. കവുങ്ങ്, റബര്‍, തേക്കിന്‍ തൈകള്‍ എന്നിവയാണ് നശിച്ചത്. ഇതോട് ചേര്‍ന്ന പനന്താനം ടോംസണ്‍ എന്ന കര്‍ഷക‍​െൻറ വിളകളും ഉരുള്‍പൊട്ടലിനെ തുര്‍ന്നുള്ള വെള്ളപ്പാച്ചിലില്‍ ഒലിച്ചുപോയി. മലവെള്ളപ്പാച്ചിലില്‍ പ്രദേശത്തെ പുഴകളും തോടുകളും കര കവിഞ്ഞു. ചാഴിയോട് പാലം വെള്ളം മൂടി. റോഡുകളില്‍ വെള്ളം മൂടി പലയിടത്തും ഗതാഗതം തടസ്സപ്പെട്ടു. പടം അടക്കാകുണ്ട് മാഞ്ചോലയിലുണ്ടായ ഉരുള്‍പൊട്ടലിനെ തുടര്‍ന്നുണ്ടായ കൃഷിനാശം