സ്​കൗട്ട്​ അധ്യാപകനെ മാറ്റരുതെന്ന ആവശ്യവുമായി വിദ്യാർഥികൾ

മലപ്പുറം: സ്കൗട്ട് അധ്യാപകനെ മാറ്റിയതിനെതിരെ പരാതിയുമായി വിദ്യാർഥികൾ ഡി.ഡി.ഇക്ക് മുന്നിൽ. എടവണ്ണ എസ്.എച്ച്.എം ജി.വി.എച്ച്.എസ്.എസിലെ അധ്യാപകനെ ജില്ലയിലെ മറ്റൊരു സ്കൂളിലേക്ക് മാറ്റിയിരുന്നു. കുട്ടികളുടെ കുറവിനെതുടർന്ന് തസ്തിക നഷ്ടം ഉണ്ടായതിനെതുടർന്നാണ് മാറ്റം. സ്റ്റാഫ് ഫിക്സേഷ​െൻറ ഭാഗമായിട്ടായിരുന്നു നടപടി. സ്കൂളിലെ സ്കൗട്ട് പ്രവർത്തനങ്ങൾക്ക് നേതൃത്വം നൽകുന്ന അധ്യാപകനെ മാറ്റരുതെന്നാണ് കുട്ടികളുടെ ആവശ്യം. കുട്ടികൾ മലപ്പുറത്തെത്തി ഡി.ഡി.ഇ ടി.പി. നിർമല ദേവിയെ കണ്ടാണ് ആവശ്യം ഉന്നയിച്ചത്. നീലാഞ്ചേരി ജി.എച്ച്.എസിലേക്കാണ് അധ്യാപകനെ മാറ്റിയത്. കുട്ടികൾ കുറവുള്ള സ്കൂളിൽനിന്നും അധ്യാപകരെ മാറ്റുന്നത് നടപടിക്രമത്തി​െൻറ ഭാഗമാണെന്ന് ഡി.ഡി.ഇ കുട്ടികളെ അറിയിച്ചു. അധ്യാപകന് ശമ്പളം കിട്ടണമെങ്കിൽ ഇതാവശ്യമാണ്. തിരുവനന്തപുരം ജില്ലയിൽനിന്നടക്കം അധ്യാപകരെ ജില്ലയിൽ മാറ്റിനിയമിച്ചിട്ടുണ്ട്. എടവണ്ണയിൽനിന്നും മാറ്റിയ അധ്യാപകന് ജില്ലയിൽതന്നെയാണ് നിയമനം നൽകിയതെന്നും ഇക്കാര്യത്തിൽ ഒന്നും ചെയ്യാനാവില്ലെന്നും ഡി.ഡി.ഇ പറഞ്ഞു.