കരുവാരകുണ്ട് ഗ്രാമപഞ്ചായത്ത് സെക്രട്ടറിക്ക് സസ്പെൻഷൻ

കരുവാരകുണ്ട്: കരുവാരകുണ്ട് ഗ്രാമപഞ്ചായത്ത് സെക്രട്ടറി എസ്. നിസാറിന് സസ്പെൻഷൻ. എടപ്പറ്റ ഗ്രാമപഞ്ചായത്ത് സെക്രട്ടറിയായിരിക്കെ ഇദ്ദേഹം ക്രമക്കേട് നടത്തിയെന്നാരോപിച്ച് തദ്ദേശ സ്വയംഭരണ മന്ത്രിക്ക് ചിലർ നൽകിയ പരാതിയെ തുടർന്നാണ് പഞ്ചായത്ത് ഡയറക്ടർ പി. മേരിക്കുട്ടിയുടെ നടപടി. 2010--2015 കാലയളവിൽ എടപ്പറ്റ ഗ്രാമപഞ്ചായത്ത് സെക്രട്ടറിയായിരിക്കെ കോഴിഫാം തുടങ്ങുന്നതിന് അനുമതി നൽകിയെന്നും അസസ്മ​െൻറ് രജിസ്റ്ററിൽ ഇല്ലാത്ത കെട്ടിടങ്ങൾക്ക് ഉടമസ്ഥാവകാശ രേഖ നൽകിയെന്നും പഞ്ചായത്ത് ബോർഡ് ചേരാതെ ഭരണസമിതി തീരുമാനങ്ങൾ നൽകിയെന്നുമാണ് പരാതിയിലുണ്ടായിരുന്നത്. കഴിഞ്ഞ മാസം ഇദ്ദേഹത്തിൽനിന്ന് ഡെപ്യൂട്ടി ഡയറക്ടർ വിശദീകരണം ആവശ്യപ്പെട്ടിരുന്നു. വിശദീകരണം തൃപ്തികരമല്ലാത്തതിനാലാണ് അച്ചടക്ക നടപടിയുടെ ഭാഗമായി സസ്പെൻഡ് ചെയ്തത്.