തവനൂര്‍ പഞ്ചായത്ത് പ്രസിഡൻറിനുള്ള പിന്തുണ സി.പി.എം പിൻവലിച്ചു

അവിശ്വാസ പ്രമേയത്തിന് നോട്ടീസ് നല്‍കി എടപ്പാൾ: തവനൂര്‍ പഞ്ചായത്ത് പ്രസിഡൻറിനുള്ള പിന്തുണ പിന്‍വലിച്ചതായും പ്രസിഡൻറിനെതിരെ അവിശ്വാസ പ്രമേയത്തിന് നോട്ടീസ് നല്‍കിയതായും സി.പി.എം നേതാക്കള്‍ വാര്‍ത്തസമ്മേളനത്തില്‍ അറിയിച്ചു. ഒന്നര വര്‍ഷമായി പാര്‍ട്ടിയുടെ പിന്തുണയിലാണ് പ്രസിഡൻറ് കെ.പി. സുബ്രഹ്മണ്യന്‍ ഭരണം നടത്തിയത്. സംസ്ഥാന സര്‍ക്കാറി​െൻറ വികസന പ്രവര്‍ത്തനങ്ങള്‍ പഞ്ചായത്തില്‍ നടപ്പാക്കാതെ പദ്ധതികള്‍ അട്ടിമറിക്കുന്ന രീതി തുടരുന്ന സാഹചര്യത്തിലാണ് പിന്തുണ പിന്‍വലിക്കാന്‍ പാര്‍ട്ടി തീരുമാനിച്ചതെന്ന് നേതാക്കള്‍ പറഞ്ഞു. 2017-18 വര്‍ഷത്തെ പദ്ധതി വിഹിതം പഞ്ചായത്തില്‍ ചെലവഴിച്ചത് 13 ശതമാനം മാത്രമാണ്. പ്ലാസ്റ്റിക് മുക്ത പഞ്ചായത്ത്, കുടിവെള്ള പദ്ധതികള്‍ എന്നിവ അട്ടിമറിച്ച പ്രസിഡൻറ് ഫിസിയോതെറപ്പി സ​െൻറർ, ആധുനിക ശ്മശാനം എന്നിവ നിർമിക്കാന്‍ ഫണ്ട് വകയിരുത്തിയിട്ടും നടപ്പാക്കിയില്ല. ലാപ്ടോപ് മോഷണ കഥ മെനഞ്ഞ് പട്ടികജാതി വിദ്യാർഥികളെ അവഹേളിച്ചെന്നും നേതാക്കള്‍ കുറ്റപ്പെടുത്തി. പി. ജ്യോതി, കെ.പി. വേണു, ടി.വി. ശിവദാസന്‍ എന്ന ബാബു, പി. മോഹന്‍ദാസ് എന്നിവർ വാര്‍ത്തസമ്മേളനത്തില്‍ സംബന്ധിച്ചു.