ഹയർ സെക്കൻഡറി പരീക്ഷസമയം മാറ്റുന്നതിനെതിരെ അധ്യാപകർ

മഞ്ചേരി: ഹയർ സെക്കൻഡറി പൊതുപരീക്ഷ സമയമാറ്റം വരുത്താനുള്ള നിർദേശങ്ങൾ നടപ്പാക്കുന്നത് ഈ മേഖലയിലെ അധ്യാപകരുടെ സേവനത്തെ ദോഷകരമായി ബാധിക്കുമെന്ന് പരാതി. പരീക്ഷ ജോലികളിൽ ഹയർ സെക്കൻഡറിയിൽ പ്രിൻസിപ്പലിനെയും അധ്യാപകരെയും സഹായിക്കാൻ ക്ലറിക്കൽ ജീവനക്കാരില്ല. ഒാരോ ദിവസവും പരീക്ഷക്കുള്ള ഇരിപ്പിട ക്രമീകരണം മുതൽ പരീക്ഷ നടത്തി ഉത്തരക്കടലാസുകൾ പായ്ക്ക് ചെയ്ത് തപാൽ വഴി അയക്കുന്ന ജോലിവരെ പരീക്ഷ മേധാവിയുടെ നേതൃത്വത്തിലാണ് നടക്കേണ്ടത്. മൂന്ന് മണിക്കൂർ നീളുന്ന പരീക്ഷ ഉച്ചക്ക് തുടങ്ങുന്ന സ്ഥിതി അധ്യാപകരെയും പരീക്ഷ ചുമതലയുള്ളവരെയും കുഴക്കുമെന്ന് ഹയർ സെക്കൻഡറി സ്കൂൾ ടീച്ചേഴ്സ് അസോസിയേഷൻ ഭാരവാഹികളായ എം. രാധാകൃഷ്ണൻ, ഡോ. സാബു ജി. വർഗീസ് എന്നിവർ പറഞ്ഞു.