മർദനം: കരുവാരകുണ്ട് മുൻ എസ്.ഐക്കെതിരെ കേസ്

മഞ്ചേരി: കട വരാന്തയിൽ ഇരുന്ന യുവാവിനെ അന്യായമായി മർദിച്ചെന്നും തടയാൻ ശ്രമിച്ച ഭാര്യയുടെ വസ്ത്രം പിടിച്ചുകീറിയെന്നുമടക്കമുള്ള പരാതിയിൽ കരുവാരകുണ്ട് മുൻ എസ്.ഐ സിൽവർസ്റ്റർക്കെതിരെ മഞ്ചേരി പട്ടികജാതി-പട്ടികവർഗ സ്പെഷൽ കോടതി കേസെടുത്തു. കരുവാരകുണ്ട് മുക്കട്ട സ്വദേശിയും ഭാര്യയും നൽകിയ പരാതിയിലാണ് നടപടി. 2015 ആഗസ്റ്റ് 15ന് രാത്രി ഒമ്പതിന് സുഹൃത്തി‍​െൻറ കട വരാന്തയിൽ ഇരിക്കവെ എസ്.ഐയും പൊലീസുകാരനും വന്ന് അകാരണമായി മർദിച്ചെന്നാണ് കേസ്. യുവാവിനെ പിടികൂടി കൊണ്ടുപോവാനുള്ള ശ്രമം നാട്ടുകാർ തടഞ്ഞിരുന്നു. എസ്.പി അടക്കമുള്ളവർക്ക് പരാതി നൽകിയെങ്കിലും കേസെടുത്തിരുന്നില്ല. പിന്നീട് മഞ്ചേരി പട്ടികജാതി-പട്ടികവർഗ സ്പെഷൽ കോടതിയിൽ നൽകിയ സ്വകാര്യ അന്യായത്തിലാണ് കേസെടുത്ത് പ്രതിക്കെതിരെ സമൻസ് അയക്കാൻ ഉത്തരവിട്ടത്. കേസ് നവംബർ നാലിന് പരിഗണിക്കും. സിൽവർസ്റ്റർ ഇപ്പോൾ തൃപ്പൂണിത്തുറ സി.പി.സി ഐ.ഡി സബ് ഇൻസ്പെക്ടറാണ്.