മാഹി തിരുനാൾ: 14നും 15നും ഗതാഗത നിയന്ത്രണം

മാഹി തിരുനാൾ: 14നും 15നും ഗതാഗത നിയന്ത്രണം മാഹി: മാഹി സ​െൻറ് തെരേസ ദേവാലയ തിരുനാളി​െൻറ പ്രധാന ദിനങ്ങളായ 14, 15 തീയതികളിൽ ക്രമസമാധാന പാലനത്തിനും ഗതാഗത നിയന്ത്രണത്തിനും മാഹി പൊലീസ് വിപുല ക്രമീകരണങ്ങൾ നടത്തുമെന്ന് എസ്.പി സി.എച്ച്. രാധാകൃഷ്ണ വാർത്താക്കുറിപ്പിൽ അറിയിച്ചു. തലശ്ശേരി ഭാഗത്തുനിന്ന് വരുന്ന ബസ്, ലോറി മുതലായ വാഹനങ്ങൾ മാഹി സെമിത്തേരി റോഡ് വഴി, ഐ.കെ. കുമാരൻ മാസ്റ്റർ റോഡ്, മാഹി റെയിൽവേ സ്റ്റേഷൻ റോഡ് വഴി അഴിയൂർ ചുങ്കം ദേശീയപാതയിൽ എത്തണം. വടകരയിൽ നിന്ന് കണ്ണൂർ ഭാഗത്തേക്ക് പോകുന്ന മുഴുവൻ വാഹനങ്ങളും മാഹി ആശുപത്രി ജങ്ഷനിൽ നിന്ന് ഇടത്തോട്ട് തിരിഞ്ഞ് താഴങ്ങാടി, ടാഗോർ പാർക്ക് വഴി ദേശീയപാതയിലേക്ക് പ്രവേശിക്കണം. മാഹി സ്പാർട്സ് ഗ്രൗണ്ടിലും ടാഗോർ പാർക്കിന് മുന്നിലും താത്തക്കുളത്തുള്ള ഗ്രൗണ്ടിലും വാഹനങ്ങൾ പാർക്ക് ചെയ്യാൻ ക്രമീകരണങ്ങൾ ചെയ്തിട്ടുണ്ട്. 14, 15 തീയതികളിൽ മാഹി ഹോസ്പിറ്റൽ ജങ്ഷൻ മുതൽ സെമിത്തേരി റോഡ് ജങ്ഷൻ വരെ വാഹനഗതാഗതം അനുവദിക്കില്ല. കൂടാതെ പോക്കറ്റടി, മോഷണം, ചൂതാട്ടം എന്നിവ തടയുന്നതിനും കുറ്റവാളികളെ തിരിച്ചറിഞ്ഞ് അവർക്കെതിരെ കർശന നടപടി സ്വീകരിക്കുന്നതിനും എസ്.പിയുടെ നേതൃത്വത്തിൽ സ്പെഷൽ ഷാഡോ ടീം പ്രവർത്തിക്കുന്നുണ്ട്. ദേവാലയത്തിനകത്ത് പ്രവേശിക്കുന്നവരുടെ ബാഗ്, മൊബൈൽ ഫോൺ മുതലായവ കർശന പരിശോധനക്ക് വിധേയമാക്കും. 14, 15 തീയതികളിൽ മാഹി ടൗണിലുള്ള മുഴുവൻ മദ്യശാലകളും അടച്ചിടേണ്ടതാണ്. അനധികൃത മദ്യവിൽപന തടയുന്നതിനും കർശന നടപടികൾ സ്വീകരിക്കും. ക്രമസമാധാന പാലനത്തിനും ട്രാഫിക് നിയന്ത്രണത്തിനുമായി പുതുച്ചേരിയിൽ നിന്ന് പ്രത്യേക സേനാംഗങ്ങൾ എത്തിച്ചേരും. ഇതിനുപുറമെ കണ്ണൂരിലെ ബോംബ് സ്ക്വാഡ്, ശ്വാനസേന എന്നിവയുടെ സേവനവും ലഭ്യമാണെന്ന് എസ്.പി അറിയിച്ചു.