പൂക്കോട്ടുംപാടത്ത് റേഷന്‍കടയും ഇനി കാഷ്‌ലെസ്

പൂക്കോട്ടുംപാടം: കറന്‍സിരഹിത ഇടപാടുകള്‍ സജീവമായതോടെ പൂക്കോട്ടുംപാടത്ത് റേഷന്‍ കടയിലും കാഷ്‌ലെസ് സംവിധാനമായി. ഹൈസ്കൂള്‍ ജങ്ഷനിലെ നെല്ലിപറമ്പന്‍ രവീന്ദ്രന്‍െറ ലൈസന്‍സിയിലുള്ള പൊതുവിതരണ കേന്ദ്രത്തിലാണ് കറന്‍സിരഹിത സൗകര്യം ഒരുക്കിയിട്ടുള്ളത്. രണ്ടുമാസമായി തുടരുന്ന നോട്ടുപ്രതിസന്ധിയും റേഷന്‍ വാങ്ങാനത്തെുന്നവരുടെ ചില്ലറക്ഷാമവും റേഷന്‍ വ്യാപാരത്തെ കാര്യമായി ബാധിച്ചിട്ടുണ്ട്. എന്നാല്‍, ഈ പ്രശ്നം പരിഹരിക്കുന്നതോടോപ്പം ഡിജിറ്റല്‍ ഇന്ത്യയുടെ ഭാഗമാവുകയുമാണ് ഈ സംവിധാനം ഉപയോഗപ്പെടുത്താന്‍ കാരണമെന്ന് രവീന്ദ്രന്‍ പറയുന്നു. ഇ-പേയ്മെന്‍റ് സേവനമായ പേ.ടി.എം വഴിയുള്ള കാഷ്ലെസ് സംവിധാനമാണ് ഇപ്പോള്‍ ഉപയോഗിക്കുന്നത്. അതിനാല്‍ പലര്‍ക്കും ഉപകാരപ്പെടുന്നുണ്ടെങ്കിലും സാധാരണക്കാരായവര്‍ക്ക് ആന്‍ഡ്രോയിഡ് ഫോണുകള്‍ ഇല്ലാത്തതും പ്രതിസന്ധിയുണ്ടാക്കുന്നുണ്ട്. ഇതുവഴി ഇടപാട് നടത്തുമ്പോള്‍ സര്‍വിസ് ചാര്‍ജായി തുക നഷ്ടപ്പെടുമെന്ന ആശങ്കയും പൊതു ജനത്തിനുണ്ട്.