പറവൂർ സംഭവം: ന്യൂനപക്ഷ കമീഷൻ കേസെടുത്തു

മലപ്പുറം: എറണാകുളം പറവൂരിൽ ലഘുലേഖ വിതരണം ചെയ്ത വിസ്ഡം ഗ്ലോബൽ പ്രവർത്തകരെ മർദിച്ച സംഭവത്തിൽ സംസ്ഥാന ന്യൂനപക്ഷ കമീഷൻ കേസെടുത്തു. സംസ്ഥാന ആഭ്യന്തര വകുപ്പ് മേധാവി, പൊലീസ് മേധാവി, എറണാകുളം ജില്ല പൊലീസ് മേധാവി എന്നിവരോട് കമീഷൻ അടിയന്തര റിപ്പോർട്ട് ആവശ്യപ്പെട്ടു. ഈ റിപ്പോർട്ടുകളുടെ അടിസ്ഥാനത്തിൽ തുടർനടപടി സ്വീകരിക്കുമെന്ന് കമീഷൻ അറിയിച്ചു. ന്യൂനപക്ഷ ദേശീയ കോഒാഡിനേറ്റർ നവാസ് റഷാദി കമീഷന് നൽകിയ പരാതിയിലാണ് നടപടി. ഞായറാഴ്ചയാണ് 'ഒരേ ഒരിന്ത്യ, ഒരൊറ്റ ജനത' എന്ന കാമ്പയി​െൻറ ഭാഗമായി പറവൂരിൽ ലഘുലേഖ വിതരണം ചെയ്തവരെ തടഞ്ഞുവെക്കുകയും മർദിക്കുകയും ചെയ്തത്. 39 പേരെ അറസ്റ്റ് ചെയ്യുകയുമുണ്ടായി. മതം അനുഷ്ഠിക്കാനും പറയാനും പ്രചരിപ്പിക്കാനുമുള്ള അവകാശത്തി​െൻറ ധ്വംസനമാണ് പറവൂരിലേതെന്ന് പരാതിക്കാരൻ ചൂണ്ടിക്കാട്ടി.