പി.വി. അന്‍വറിന്‍െറ സ്ഥാനാര്‍ഥിത്വം: പോത്തുകല്ലിലും ചുങ്കത്തറയിലും പ്രകടനം

എടക്കര: നിലമ്പൂരില്‍ പി.വി. അന്‍വറിനെ ഇടതു സ്ഥാനാര്‍ഥിയാക്കിയതില്‍ പ്രതിഷേധിച്ച് പോത്തുകല്ലിലും ചുങ്കത്തറയിലും പ്രകടനം. പോത്തുകല്ലില്‍ സി.പി.എമ്മിന്‍െറ രണ്ട് ബ്രാഞ്ച് സെക്രട്ടറിമാരും ഏതാനും അംഗങ്ങളും മുന്‍ ലോക്കല്‍ സെക്രട്ടറിയും പ്രകടനത്തിന് നേതൃത്വം നല്‍കി. ആനക്കല്ല് ബ്രാഞ്ച് സെക്രട്ടറി ജോയി, ചെമ്പന്‍കൊല്ലി ബ്രാഞ്ച് സെക്രട്ടറി റെജി, മുന്‍ ലോക്കല്‍ കമ്മിറ്റിയംഗം ജോസ് ആന്‍റണി, ഡി.വൈ.എഫ്.ഐ എടക്കര ബ്ളോക്ക് കമ്മിറ്റിയംഗം മെഹബൂബ്, മുന്‍ അംഗം ഷംസുദ്ദീന്‍, ലിയാഖത്തലി, ടി.എന്‍. സത്യന്‍, സതീഷ് ഞെട്ടിക്കുളം എന്നിവരുടെ നേതൃത്വത്തിലാണ് ഒരുകൂട്ടം പ്രവര്‍ത്തകര്‍ ബുധനാഴ്ച പ്രകടനം നടത്തിയത്. അണ്ടിക്കുന്ന് ബ്രാഞ്ച് കമ്മിറ്റി അംഗങ്ങളുടെ നേതൃത്വത്തിലായിരുന്നു വൈകീട്ട് ചുങ്കത്തറ ടൗണില്‍ പ്രകടനം നടന്നത്. പ്രകടനത്തില്‍ അന്‍വറിന്‍െറ കോലം കത്തിക്കുകയും ചെയ്തു. പി. പ്രശാന്ത്, ഷിജാദ്, മാനുപ്പ എന്നിവര്‍ നേതൃത്വം നല്‍കി. പാര്‍ട്ടി പ്രവര്‍ത്തകരുടെ താല്‍പര്യത്തിനെതിരായ സ്ഥാനാര്‍ഥി നിര്‍ണയത്തില്‍ പ്രതിഷേധിച്ച് ചുങ്കത്തറയില്‍ രാജിവെച്ച ലോക്കല്‍ കമ്മിറ്റി അംഗങ്ങളുടെ എണ്ണം 13 ആയി. വരും ദിവസങ്ങളിലും പ്രതിഷേധങ്ങളുയരുമെന്നാണ് സൂചന. രാജിവെച്ചവരുടെ നേതൃത്വത്തില്‍ ഭാവി കാര്യങ്ങള്‍ തീരുമാനിക്കുന്നതിനായി അടുത്ത ദിവസം യോഗം ചേരാനും ആലോചിക്കുന്നതായി ബന്ധപ്പെട്ടവര്‍ അറിയിച്ചു.