കരുളായി ശങ്കരംകോട്ട് റബര്‍ തോട്ടത്തില്‍ വന്‍ തീപിടിത്തം

കരുളായി: നെടുങ്കയം വനമേഖലയോട് ചേര്‍ന്ന ശങ്കരംകോട്ട് സ്വകാര്യ വ്യക്തികളുടെ റബര്‍ തോട്ടത്തിനു തീപിടിച്ചു. കരുളായി വാരിക്കല്‍ തെക്കും പുറത്ത് ഹംസ, സുലൈമാന്‍ എന്നിവരുടെ ഉടമസ്ഥതയിലുള്ള 13.5 ഏക്കര്‍ തോട്ടത്തിനാണ് തീപിടിച്ചത്. അടിക്കാട് വെട്ടിയിരുന്നതിനാല്‍ കൂടുതല്‍ നാശം ഒഴിവായി. ഉണങ്ങിയ ഇലകള്‍ക്ക് തീ പടര്‍ന്നതിനാല്‍ റബര്‍ മരങ്ങളിലെ ഇലകളും വേരുകളും കരിഞ്ഞിട്ടുണ്ട്. ബുധനാഴ്ച ഉച്ചയോടെയാണ് തോട്ടത്തില്‍ തീ പടര്‍ന്നത്. 10 ഏക്കറോളം ആറു വര്‍ഷം വളര്‍ച്ചയുള്ള ടാപ്പിങിനായ മരങ്ങളും മൂന്നര എക്കറോളം മൂന്നു വര്‍ഷം വളര്‍ച്ചയുള്ള തൈ മരങ്ങളുമാണ് തോട്ടത്തിലുള്ളത്. കാവല്‍ക്കാര്‍ ഉണ്ടെങ്കിലും ബുധനാഴ്ച ഉച്ചക്ക് ശേഷം അവര്‍ പുറത്ത് പോയ സമയത്താണ് അഗ്നിബാധയുണ്ടായത്. അവര്‍ വൈകുന്നേരത്ത് തിരിച്ചത്തെിയപ്പോഴാണ് തോട്ടം കത്തിയ നിലയില്‍ കണ്ടത്. വേനല്‍ക്കാലത്ത് അഗ്നിബാധ ഒഴിവാക്കാന്‍ വേണ്ട ക്രമീകരണങ്ങള്‍ തോട്ടത്തില്‍ ചെയ്തതായി ഉടമകള്‍ പറയുന്നു. സമീപ പ്രദേശത്തെ തോട്ടങ്ങളിലും വനമേഖലയിലും തീ പടര്‍ന്നിട്ടുമില്ല. ഇതിനാല്‍ തോട്ടം കത്തിച്ചതാണെന്ന സംശയം നിലനില്‍ക്കുന്നുണ്ട്. പൂക്കോട്ടുംപാടം പൊലീസില്‍ പരാതി നല്‍കി.