അലക്ഷ്യമായ ടി.വി കേബ്ള്‍ ഭീഷണിയാകുന്നു

വേങ്ങര: വൈദ്യുതി തൂണുകളില്‍ സുരക്ഷാ സംവിധാനങ്ങളൊരുക്കാതെ അലക്ഷ്യമായി കേബ്ള്‍ ടി.വി വയറുകള്‍ കെട്ടിവെച്ചത് സുരക്ഷാ ഭീഷണി ഉയര്‍ത്തുന്നു. ഇതിലൂടെ വൈദ്യുതി പ്രവഹിച്ച് അപകട സാധ്യത ഏറെയാണ്. സ്വകാര്യ കേബ്ള്‍ ടി.വി ഓപറേറ്റര്‍മാരുടെ വിതരണ ലൈന്‍ മഴക്കാലത്ത് മതിയായ സുരക്ഷാ സംവിധാനങ്ങള്‍ പാലിക്കാതെയാണ് വൈദ്യുതി തൂണുകളില്‍ സ്ഥാപിച്ചിരിക്കുന്നത്. നൂറുകണക്കിന് വൈദ്യുതി പോസ്റ്റുകളില്‍ ഇത്തരത്തില്‍ ടി.വി കേബ്ളുകള്‍ സ്ഥാപിച്ചിട്ടുണ്ട്. ഇടിമിന്നല്‍, ഷോട്ട്സര്‍ക്യൂട്ട് എന്നിവയിലൂടെ വൈദ്യുതി പ്രവഹിക്കുന്നത് അപകടത്തിനിടയാക്കും. നേരത്തേ കേബ്ള്‍ ലൈന്‍ വഴി ടി.വി, സെറ്റപ്പ് ബോക്സ് എന്നിവയില്‍ വൈദ്യുതിയത്തെി നിരവധി അപകടങ്ങള്‍ സംഭവിച്ചിട്ടുണ്ട്. വൈദ്യുതി വകുപ്പിന് സ്ഥാപിച്ച പോസ്റ്റുകളുടെ എണ്ണം കുറച്ചുകാട്ടി വന്‍തോതില്‍ സാമ്പത്തിക വെട്ടിപ്പ് നടത്തുന്നതായും പരാതി ഉയര്‍ന്നിട്ടുണ്ട്. മതിയായ സുരക്ഷ ഒരുക്കണമെന്ന ആവശ്യം ശക്തമായിട്ടുണ്ട്.