മങ്കട മേലെ ജങ്ഷനിലെ കുരുക്കഴിയുന്നില്ല

മങ്കട: ഒരു നിമിഷത്തെ അശ്രദ്ധയോ ഒരു അനധികൃത പാര്‍ക്കിങ്ങോ മതി മങ്കട മേലെ ജങ്ഷനില്‍ മണിക്കൂറുകള്‍ ഗതാഗത തടസ്സമുണ്ടാകാന്‍. സിഗ്നല്‍ സംവിധാനമോ നിയന്ത്രിക്കാന്‍ ആളോ ഇല്ലാതെ അനിയന്ത്രിതമായി വാഹനങ്ങള്‍ കടന്നുപോകുന്നതിനാല്‍ ഇവിടെ കുരുക്ക് നിത്യസംഭവമാണ്. തിങ്കളാഴ്ച വൈകീട്ട് ആറരയോടെ തുടങ്ങിയ ഗതാഗതക്കുരക്കില്‍ വാഹനങ്ങളും യാത്രക്കാരും പ്രയാസപ്പെട്ടപ്പോള്‍ പ്രദേശത്തെ ഓട്ടോ ഡ്രൈവര്‍മാരും നാട്ടുകാരം ഏറെ പണിപെട്ടാണ് കുരുക്ക് ഒഴിവാക്കിയത്. അര മണിക്കൂറോളം കുരുക്ക് നീണ്ടു. ഒരു മണ്ണുമാന്തിയന്ത്രം കടന്നുപോകാന്‍ എടുത്തസമയം കൊണ്ടാണ് റോഡില്‍ വാഹനങ്ങള്‍ നിറഞ്ഞത്. നാലുറോഡുകള്‍ ചേരുന്ന ഈ ഭാഗം യാത്രക്കാര്‍ക്ക് സ്ഥിരം തലവേദനയാണ്. വര്‍ഷങ്ങളായുള്ള ഈ പ്രശ്നത്തിന് പരിഹാരം കാണുമെന്ന് പഞ്ചായത്ത് ഭരണസമിതി പറഞ്ഞിരുന്നെങ്കിലും ഇതുവരെ യാതൊരു നീക്കവും നടന്നിട്ടില്ല. ഒരു ട്രാഫിക് പൊലീസിനെ വെക്കണമെന്ന ആവശ്യവും പരിഗണിച്ചിട്ടില്ല.