തിരൂരങ്ങാടി നഗരസഭയില്‍ വയോമിത്രം പദ്ധതി തുടങ്ങുന്നു

തിരൂരങ്ങാടി: വൃദ്ധജനങ്ങളുടെ ക്ഷേമം ലക്ഷ്യമാക്കി സാമൂഹിക നീതിവകുപ്പിന് കീഴില്‍ നടപ്പാക്കുന്ന വയോമിത്രം പദ്ധതിയില്‍ തിരൂരങ്ങാടി നഗരസഭയെ ഉള്‍പ്പെടുത്തിയതായി സാമൂഹിക സുരക്ഷ മിഷന്‍ എക്സിക്യൂട്ടിവ് ഡയറക്ടര്‍ ഡോ. പി.പി. അഷ്റഫ് അറിയിച്ചു. വയോമിത്രം പദ്ധതി അനുവദിക്കണമെന്നാവശ്യപ്പെട്ട് വിദ്യാഭ്യാസ മന്ത്രി പി.കെ. അബ്ദുറബ്ബ് സാമൂഹിക നീതി മന്ത്രി ഡോ. എം.കെ. മുനീര്‍ എന്നിവര്‍ക്ക് നഗരസഭ നിവേദനം നല്‍കിയിരുന്നു. എ.പി.എല്‍-ബി.പി.എല്‍ വ്യത്യാസമില്ലാതെ 65 വയസ്സ് തികഞ്ഞ നഗരസഭയിലെ വൃദ്ധജനങ്ങള്‍ക്ക് മരുന്നും ചികിത്സയും സൗജന്യമായി നല്‍കുന്ന പദ്ധതിയാണ് വയോമിത്രം. ഡോക്ടര്‍മാര്‍ നഗരസഭയിലെ വിവിധ സെന്‍ററുകളില്‍ പരിശോധനക്കത്തെും. നഗരസഭയില്‍ ധാരാളം വൃദ്ധജനങ്ങള്‍ക്ക് മരുന്നുകളും ചികിത്സയും സൗജന്യമായി നല്‍കുന്ന പദ്ധതി നഗരസഭയിലെ ഏറെ പേര്‍ക്ക് ഉപകാരപ്പെടും. നഗരസഭയില്‍ രണ്ടായിരത്തോളം വൃദ്ധര്‍ക്ക് ക്ഷേമ പെന്‍ഷന്‍ നല്‍കുന്നുണ്ട്. വയോമിത്രം പദ്ധതി അനുവദിക്കാനുള്ള സാമൂഹിക സുരക്ഷ മിഷന്‍ തീരുമാനത്തെ നഗരസഭ കൗണ്‍സില്‍ സ്വാഗതം ചെയ്തു. ചെയര്‍പേഴ്സന്‍ കെ.ടി. റഹീദ അധ്യക്ഷത വഹിച്ചു. വൈസ് ചെയര്‍മാന്‍ എം. അബ്ദുറഹ്മാന്‍കുട്ടി. സ്റ്റാന്‍ഡിങ് കമ്മിറ്റി ചെയര്‍മാന്മാരായ ഉള്ളാട്ട് റസിയ, ഇഖ്ബാല്‍ കല്ലുങ്ങല്‍, സി.പി. സുഹ്റാബി. സി.പി. ഹബീബ ബഷീര്‍, വി.വി അബു, സെക്രട്ടറി കോയ വെള്ളക്കാന്‍തൊടി എന്നിവര്‍ സംസാരിച്ചു.