മങ്കട സബ്സ്റ്റേഷന്‍ ഇന്ന് നാടിന് സമര്‍പ്പിക്കും

മങ്കട: മങ്കട 66 കെ.വി സബ് സ്റ്റേഷന്‍ ഇന്ന് മുഖ്യമന്ത്രി നാടിന് സമര്‍പ്പിക്കും. വോള്‍ട്ടേജ് ക്ഷാമമടക്കമുള്ള മങ്കടയിലെയും പരിസരങ്ങളിലെയും വൈദ്യുത പ്രശ്നങ്ങള്‍ക്ക് ഇതോടെ പരിഹാരമാകും. മങ്കട പാലക്കതടത്തെ കുന്നിന്‍ചെരിവിലെ ഒന്നേകാല്‍ ഏക്കര്‍ സ്ഥലത്ത് 2011 ഡിസംബര്‍ 31നാണ് മന്ത്രി ആര്യാടന്‍ മുഹമ്മദ് പ്രവൃത്തിയുടെ ഉദ്ഘാടനം നിര്‍വഹിച്ചത്. ഒരു വര്‍ഷം കൊണ്ട് പ്രവൃത്തി പൂര്‍ത്തിയാക്കി ഉദ്ഘാടനം ചെയ്യുമെന്ന് പ്രഖ്യാപിച്ചാണ് പ്രവൃത്തികള്‍ തുടങ്ങിയത്. എന്നാല്‍, സമയത്തിന് പ്രവൃത്തികള്‍ തീര്‍ക്കാന്‍ സാധിച്ചില്ല. ഇതാണ് ഉദ്ഘാടനം വൈകാന്‍ കാരണമായത്. രാജീവ് ഗാന്ധി ഗ്രാമീണ വൈദ്യുതീകരണ യോചന പദ്ധതിയില്‍ ഉള്‍പ്പെടുത്തി 5.25 കോടി രൂപ ചെലവിലാണ് സ്റ്റേഷന്‍ നിര്‍മാണം. ശനിയാഴ്ച മങ്കട ഗവ. ഹൈസ്കൂളില്‍ വൈകീട്ട് അഞ്ചിന് നടക്കുന്ന ചടങ്ങില്‍ മന്ത്രി ആര്യാടന്‍ മുഹമ്മദ് അധ്യക്ഷത വഹിക്കും. ടി.എ. അഹമ്മദ് കബീര്‍ എം.എല്‍.എ മുഖ്യപ്രഭാഷണം നടത്തും.