ടാര്‍ മിക്സിങ് പ്ളാന്‍റിനെതിരെ ജനകീയ സമരം വിജയം കണ്ടു

എടവണ്ണ: പത്തപ്പിരിയത്ത ടാര്‍ മിക്സിങ് പ്ളാന്‍റിനെതിരെ രണ്ടു വര്‍ഷത്തോളമായി നാട്ടുകാര്‍ നടത്തിവന്ന സമരം വിജയംകണ്ടു. പ്ളാന്‍റിലേക്ക് കൊണ്ടുവന്നിരുന്ന യന്ത്ര സാമഗ്രികള്‍ തിരികെ കൊണ്ടുപോയി. രണ്ടാഴ്ച മുമ്പ് സമരസമിതി നേതാക്കളും ക്വാറി ഉടമയും നടത്തിയ ചര്‍ച്ചയിലാണ് സമരസമിതി ഉന്നയിച്ച 18 ഉടമ്പടികള്‍ ക്വാറി ഉടമ അംഗീകരിക്കാന്‍ തയാറായത്. തുടര്‍ന്നാണ് തിങ്കളാഴ്ച ക്വാറിയില്‍നിന്ന് യന്ത്ര സാമഗ്രികള്‍ തിരിച്ചു കൊണ്ടുപോയത്. സമരത്തിന്‍െറ ഭാഗമായി ക്രഷറിലേക്ക് യന്ത്ര സാമഗ്രികളുമായി വന്ന ലോറികള്‍ സമരാനുകൂലികള്‍ തടയുകയും സംഘര്‍ഷത്തെ തുടര്‍ന്ന് പൊലീസ് ലാത്തി ചാര്‍ജിനിടെ കീര്‍ത്തിയില്‍ അയ്യപ്പനെ കിണറ്റില്‍ മരിച്ച നിലയില്‍ കണ്ടത്തെിയിരുന്നു. യന്ത്ര സാമഗ്രികളുമായി വന്ന മൂന്ന് ലോറികളും യന്ത്രങ്ങളും അഗ്നിക്കിരയാവുകയും ചെയ്തിരുന്നു. യന്ത്രങ്ങള്‍ തിരിച്ചു കൊണ്ടുപോവുന്ന സമയം പത്തപ്പിരിയത്ത് നാട്ടുകാര്‍ ആഹ്ളാദ പ്രകടനവും നടത്തി.