പഞ്ചായത്തുകളുടെ പ്രവര്‍ത്തനം അവതാളത്തിലേക്ക്

മലപ്പുറം: ജില്ലയിലെ പൂക്കോട്ടൂര്‍, തിരുവാലി, കീഴാറ്റൂര്‍, കുറുവ, വെളിയംകോട്, ആലിപ്പറമ്പ്, മൂര്‍ക്കനാട്, ആലംകോട്, പെരുമ്പടപ്പ്, പള്ളിക്കല്‍, ഇരിമ്പിളിയം, പാണ്ടിക്കാട്, കൂട്ടിലങ്ങാടി, വാഴയൂര്‍ തുടങ്ങിയ 15 പഞ്ചായത്തുകളില്‍ സെക്രട്ടറി തസ്തികയും ജില്ലയിലെ പഞ്ചായത്ത് ഡെപ്യൂട്ടി ഡയറക്ടര്‍, പഞ്ചായത്ത് അസി. ഡയറക്ടര്‍ തസ്തികയും ഒരുവര്‍ഷമായി ഒഴിഞ്ഞുകിടക്കുകയാണ്. പഞ്ചായത്ത് ഡെപ്യൂട്ടി ഡയറക്ടറുടെ ചുമതല പാലക്കാട് ഡെപ്യൂട്ടി ഡയറക്ടര്‍ക്കും അസി. ഡയറക്ടറുടെ ചുമതല സീനിയര്‍ സൂപ്രണ്ടിനുമാണ്. ഈ നില തുടര്‍ന്നാല്‍ പഞ്ചായത്തുകളുടെ ഈ വര്‍ഷത്തെ പദ്ധതി നിര്‍വഹണം, അടുത്തവര്‍ഷത്തെ പദ്ധതി രൂപവത്കരണം, പെന്‍ഷന്‍ വിതരണം, പെന്‍ഷന്‍ ചെക് വിതരണ ക്യാമ്പ് തുടങ്ങിയവ അവതാളത്തിലാകുമെന്ന് കെ.പി.ഇ.ഒ ജില്ലാ സമിതി വിലയിരുത്തി. വൈസ് പ്രസിഡന്‍റ് നൗഷാദലി നിലമ്പൂര്‍ അധ്യക്ഷത വഹിച്ചു. എ. മുഹമ്മദ് ബഷീര്‍, സി.പി. രാജീവന്‍, എം. മജീദ്, അബ്ദുല്‍മാലിക്, പി.വി. നാസര്‍, പ്രേമകുമാരന്‍, സുരേന്ദ്രന്‍, പി. സക്കീര്‍ തുടങ്ങിയവര്‍ സംസാരിച്ചു.