ഈ മാസം പിടികൂടിയത് 548 ലിറ്റര്‍ മദ്യവും 325 ലിറ്റര്‍ വാഷും

മലപ്പുറം: നിയമസഭാ തെരഞ്ഞെടുപ്പുമായി ബന്ധപ്പെട്ട് ഏപ്രില്‍ ഒന്നുമുതല്‍ 28 വരെ ജില്ലയില്‍ എക്സൈസ് വകുപ്പ് നടത്തിയ പരിശോധനയില്‍ 548.41 ലിറ്റര്‍ വിദേശ മദ്യവും 21 ലിറ്റര്‍ ചാരായവും 325 ലിറ്റര്‍ വാഷും 16.2 ലിറ്റര്‍ അരിഷ്ടവും പിടിച്ചെടുത്തതായി മലപ്പുറം അസി. എക്സൈസ് കമീഷണര്‍ അറിയിച്ചു. 657 റെയ്ഡുകളിലായി 92 അബ്കാരി കേസുകളാണ് ഈ കാലയളവില്‍ രജിസ്റ്റര്‍ ചെയ്തത്. 29 കഞ്ചാവ് കേസുകളിലായി 3.913 കിലോഗ്രാം കഞ്ചാവും നാല് കഞ്ചാവ് ചെടികളും പിടിച്ചെടുത്തു. വിവിധ കേസുകളിലായി 14 വാഹനങ്ങളും പിടികൂടി. വഴിക്കടവ് എക്സൈസ് ചെക് പോസ്റ്റില്‍ വാഹന പരിശോധനക്കിടെ 66,000 പാക്കറ്റ് ഹാന്‍സും പിടിച്ചെടുത്തു. മറ്റ് വകുപ്പുകളുമായി സഹകരിച്ചും റെയ്ഡുകള്‍ നടത്തി വരുന്നതായി അസി. എക്സൈസ് കമീഷണര്‍ പി. ബാലകൃഷ്ണന്‍ അറിയിച്ചു.