15 വര്‍ഷമായി ഒളിവിലായിരുന്ന തട്ടിപ്പുകേസ് പ്രതി പിടിയില്‍

മലപ്പുറം: 15 വര്‍ഷമായി ഒളിവിലായിരുന്ന തട്ടിപ്പ് കേസ് പ്രതിയെ അറസ്റ്റ് ചെയ്തു. കൊണ്ടോട്ടി മേലങ്ങാടി സ്വദേശി കല്ലിങ്ങല്‍ അബ്ദുല്‍ ഹമീദാണ് (49) മലപ്പുറം പൊലീസിന്‍െറ പിടിയിലായത്. വാഹനം മോഷ്ടിച്ച ശേഷം പ്രതിയുടെ പേരിലേക്ക് മാറ്റാന്‍ വ്യാജരേഖ നിര്‍മിച്ച് മലപ്പുറം ആര്‍.ടി ഓഫിസില്‍ സമര്‍പ്പിച്ചതായാണ് കേസ്. മലപ്പുറം പൊലീസ് രജിസ്റ്റര്‍ ചെയ്ത കേസില്‍ അന്വേഷണം നടക്കവേ പ്രതി വിദേശത്തേക്ക് മുങ്ങുകയായിരുന്നു. ഇയാള്‍ക്ക് മറ്റ് സ്റ്റേഷനുകളില്‍ കേസുണ്ടോ എന്ന കാര്യം പരിശോധിച്ചു വരികയാണെന്ന് എസ്.ഐ ജാബിര്‍ പള്ളിയാളി പറഞ്ഞു. സ്പെഷല്‍ സ്ക്വാഡ് അംഗങ്ങളായ മുഹമ്മദ് ഷാക്കിര്‍, എന്‍.എം. അബ്ദുല്ല ബാബു, ഉണ്ണികൃഷ്ണന്‍ എന്നിവരാണ് പ്രതിയെ അറസ്റ്റ് ചെയ്തത്.