ബില്ലടച്ചില്ല; പൊലീസ് സ്റ്റേഷനുകളിലെ ടെലിഫോണ്‍, ഇന്‍റര്‍നെറ്റ് കണക്ഷനുകള്‍ വിച്ഛേദിച്ചു

എടക്കര: ബില്ലടക്കാത്തതിന്‍െറ പേരില്‍ ജില്ലയിലെ പൊലീസ് സ്റ്റേഷനുകളിലെ ബി.എസ്.എന്‍.എല്‍ ടെലിഫോണ്‍, ഇന്‍റര്‍നെറ്റ് കണക്ഷനുകള്‍ വിച്ഛേദിച്ചു. ജില്ലയിലെ മിക്ക പൊലീസ് സ്റ്റേഷനുകളിലെയും ടെലിഫോണുകളില്‍ ഇന്‍കമിങ് കോളുകളുടെ സേവനം മാത്രമാണ് ബുധനാഴ്ച ലഭിച്ചത്. ഒൗട്ട് ഗോയിങ് കോളുകള്‍ക്ക് പുറമെ ഇന്‍റര്‍നെറ്റ് കണക്ഷനുമാണ് വിച്ഛേദിച്ചത്. എല്ലാ തവണയും 15ാം തീയതിക്കുള്ളില്‍ ബില്ലുകള്‍ അതാത് സ്റ്റേഷനുകളില്‍ നിന്ന് ജില്ലാ പൊലീസ് ഓഫിസിലേക്ക് കൈമാറുകയാണ് പതിവ്. ജില്ലയിലെ അമ്പതോളം സ്റ്റേഷനുകളിലെ ഇന്‍റര്‍നെറ്റ് അടക്കമുള്ള സംവിധാനങ്ങള്‍ ഉപയോഗിച്ചതിന് ഭീമമായ തുക ജില്ലാ പൊലീസ് ഓഫിസില്‍ നിന്ന് ഒന്നിച്ചാണ് അടക്കുന്നത്. എന്നാല്‍, ഇത്തവണ ഓണാവധിയും ഇതിനിടയില്‍ വന്നതാണ് ബില്ലടക്കാന്‍ വൈകാന്‍ കാരണമെന്ന് കരുതുന്നു.