ഉച്ചക്കഞ്ഞി വിതരണത്തില്‍ ക്രമക്കേടെന്ന് പരാതി: കര്‍ശന പരിശോധനക്ക് നിര്‍ദേശം

മലപ്പുറം: സ്കൂളുകളിലെ ഉച്ചക്കഞ്ഞി വിതരണത്തില്‍ വന്‍ ക്രമക്കേടുകള്‍ നടക്കുന്നതായി പരാതിയുയര്‍ന്ന സാഹചര്യത്തില്‍ കര്‍ശന പരിശോധന നടത്താന്‍ അഴിമതി നിവാരണ വിജിലന്‍സ് മോണിറ്ററിങ് സമിതി യോഗം തീരുമാനിച്ചു. ആനമങ്ങാട്, തിരൂരങ്ങാടി ഗവ. ഹയര്‍സെക്കന്‍ഡറി സ്കൂളുകളില്‍ വ്യവസ്ഥകള്‍ പാലിക്കാതെ നിര്‍മിച്ച കെട്ടിടങ്ങളില്‍ ക്ളാസ് നടത്തുന്നതായി ലഭിച്ച പരാതിയില്‍ റിപ്പോര്‍ട്ട് നല്‍കാനും വിദ്യാഭ്യാസ ഉപ ഡയറക്ടറോട് യോഗം നിര്‍ദേശിച്ചു. പരാതികളുമായി ബന്ധപ്പെട്ട വകുപ്പുകളിലെ ജില്ലാതല ഉദ്യോഗസ്ഥര്‍ യോഗത്തില്‍ പങ്കെടുക്കാത്തതില്‍ യോഗം അതൃപ്തി രേഖപ്പെടുത്തുകയും വിശദീകരണം തേടാനും തീരുമാനിച്ചു. നാല് പരാതികളാണ് സമിതിക്ക് ലഭിച്ചത്. കഴിഞ്ഞ യോഗത്തില്‍ ലഭിച്ച മൂന്ന് പരാതികളില്‍ രണ്ടെണ്ണം തീര്‍പ്പായി. യോഗത്തില്‍ ഡിവൈ.എസ്.പി കെ. സലീം, ആര്‍.ടി.ഒ എം.പി. അജിത് കുമാര്‍, ജില്ലാതല ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.