പ്രചാരണച്ചൂടിനിടെ കൗണ്‍സില്‍ യോഗം ചേരാന്‍ നഗരസഭ

മഞ്ചേരി: നഗരസഭാ കൗണ്‍സിലര്‍മാരും രാഷ്ട്രീയ പാര്‍ട്ടികളും തെരഞ്ഞെടുപ്പ് പ്രചാരണത്തിലേക്ക് നീങ്ങിയിരിക്കെ മഞ്ചേരിയില്‍ നഗരസഭൗ കൗണ്‍സില്‍ യോഗം ചേരുന്നു. കൗണ്‍സിലിന്‍െറ അടിയന്തര യോഗം എന്ന കുറിപ്പോടെയാണ് അംഗങ്ങള്‍ക്ക് കത്ത് ലഭിച്ചത്. ക്ളീന്‍ കേരള കമ്പനിയുടെ ഒക്ടോബര്‍ ഏഴിലെ കത്ത് പ്രകാരം 1000 സ്ക്വയര്‍ഫീറ്റ് വിസ്തീര്‍ണമുള്ള ഷെഡും അനുബന്ധമായി വൈദ്യുതി കണക്ഷനും വെള്ളവും ലഭ്യമാക്കുകയാണെങ്കില്‍ പ്ളാസ്റ്റിക് മാലിന്യങ്ങള്‍ സംസ്കരിക്കാനുള്ള കേന്ദ്രം നടപ്പാക്കാന്‍ തയാറാണെന്ന് ക്ളീന്‍ കേരള കമ്പനി നഗരസഭയെ അറിയിച്ചിട്ടുണ്ട്. ഇത് സംബന്ധിച്ച് നഗരസഭാ കൗണ്‍സില്‍ യോഗത്തില്‍ ചര്‍ച്ച ചെയ്ത് തീരുമാനം കൈക്കൊള്ളാന്‍ ചൊവ്വാഴ്ച വൈകീട്ട് മൂന്നിന് നഗരസഭാ ഓഫിസിലാണ് യോഗം. അതേസമയം തെരഞ്ഞെടുപ്പ് പെരുമാറ്റച്ചട്ടം നിലനില്‍ക്കെ കൗണ്‍സില്‍ യോഗം ചേര്‍ന്ന് പുതിയ പദ്ധതി പ്രഖ്യാപിക്കാനും വോട്ടര്‍മാരെ സ്വാധീനിക്കാനുമുള്ള ശ്രമം തടയണമെന്നാവശ്യപ്പെട്ട് സി.പി.എം അംഗം കെ.പി. രാവുണ്ണി തെരഞ്ഞെടുപ്പ് കമീഷന് പരാതി നല്‍കി.