താമസ സൗകര്യമില്ല : ഹെല്‍ത്ത് സയന്‍സ് വിദ്യാര്‍ഥികള്‍ സര്‍വകലാശാല മാര്‍ച്ച് നടത്തി

തേഞ്ഞിപ്പലം: കോഴ്സ് ആരംഭിച്ച് നിരവധി വര്‍ഷങ്ങള്‍ പിന്നിട്ടിട്ടും താമസ സൗകര്യം ഏര്‍പെടുത്താത്തതില്‍ പ്രതിഷേധിച്ച് സ്കൂള്‍ ഓഫ് ഹെല്‍ത്ത് സയന്‍സ് വിദ്യാര്‍ഥികള്‍ കാലിക്കറ്റ് സര്‍വകലാശാലയിലേക്ക് മാര്‍ച്ച് നടത്തി. സര്‍വകലാശാല നേരിട്ട് നടത്തുന്ന സ്വാശ്രയ കോഴ്സായ സ്കൂള്‍ ഓഫ് ഹെല്‍ത്ത് സയന്‍സ് വിദ്യാര്‍ഥികളില്‍നിന്ന് വന്‍ തുകയാണ് ഫീസിനത്തില്‍ ഈടാക്കുന്നത്. എന്നിട്ടും താമസ സൗകര്യം ഏര്‍പ്പെടുത്താത്തതില്‍ പ്രതിഷേധിച്ചായിരുന്നു മാര്‍ച്ച്. ആക്ടിങ് വി.സി പങ്കെടുത്ത എന്‍.എസ്.എസ് അവാര്‍ഡ് ദാന ചടങ്ങ് നടക്കുന്ന സെമിനാര്‍ കോംപ്ളക്സിലേക്കായിരുന്നു ആദ്യം വിദ്യാര്‍ഥികള്‍ മാര്‍ച്ച് നടത്തിയത്. വിദ്യാര്‍ഥി വിഭാഗം തലവന്‍ പി.വി. വത്സരാജ് വിദ്യാര്‍ഥികളുമായി നടത്തിയ ചര്‍ച്ചയില്‍ ഭരണ വിഭാഗത്തില്‍ വെച്ച് പ്രശ്നം പരിഹരിക്കാന്‍ നടപടി സ്വീകരിക്കുമെന്ന് പറഞ്ഞു. ഇതിന്‍െറ അടിസ്ഥാനത്തില്‍ ഭരണ കാര്യാലയത്തിന് മുന്നിലേക്ക് പ്രതിഷേധം മാറ്റി. ആക്ടിങ് വി.സി ഡോ. എം.കെ. ഖാദര്‍ മാങ്ങാട്, രജിസ്ട്രാര്‍ ടി.എ. അബ്ദുല്‍ മജീദ് എന്നിവരുമായി വിദ്യാര്‍ഥി പ്രതിനിധികളായ ജി.കെ. രാഹുല്‍, സചിന്‍ദേവ് എന്നിവര്‍ നടത്തിയ ചര്‍ച്ചയില്‍ രണ്ട് ദിവസത്തിനകം താമസ സൗകര്യം ഒരുക്കുമെന്ന് അധികൃതര്‍ ഉറപ്പ് നല്‍കി. വിദേശത്തെ വിദ്യാര്‍ഥികള്‍ക്കായി നിര്‍മിച്ച ഹോസ്റ്റല്‍, ഗെസ്റ്റ് ഹൗസ് ഹോസ്റ്റല്‍ എന്നിവ ഇവര്‍ക്കായി പരിഗണിക്കും.