ക്ളാസ് മുറി ക്ഷാമത്തിന് പരിഹാരവുമായി എം.എല്‍.എ

തിരൂര്‍: എം.എല്‍.എയുടെ സമഗ്ര വിദ്യാഭ്യാസ വികസന പദ്ധതിയിലുള്‍പ്പെടുത്തി ബി.പി അങ്ങാടി ഗവ. ഗേള്‍സ് ഹയര്‍സെക്കന്‍ഡറി സ്കൂളില്‍ നിര്‍മിച്ച നാലുമുറി കെട്ടിടത്തിന് വേണ്ടിയുള്ള പിടിവലിക്ക് പരിഹാരം കണ്ടത്തെി എം.എല്‍.എയുടെ ഇടപെടല്‍. പുതിയ കെട്ടിടത്തിന് മുകളില്‍ ഹയര്‍സെക്കന്‍ഡറിക്ക് പുതിയ രണ്ട് ക്ളാസ് മുറികള്‍ നിര്‍മിക്കാന്‍ എം.എല്‍.എ തുക അനുവദിച്ചു. ഇതുകൂടി പൂര്‍ത്തിയായ ശേഷം കെട്ടിടത്തിന്‍െറ ഉദ്ഘാടനം നടത്തിയാല്‍ മതിയെന്നും എം.എല്‍.എ നിര്‍ദേശിച്ചു. ചായം പൂശലുള്‍പ്പെടെ പൂര്‍ത്തിയാക്കി കെട്ടിടം ഒക്ടോബര്‍ ആറിന് ഉദ്ഘാടനം ചെയ്യാനിരിക്കെയാണ് എം.എല്‍.എയുടെ പുതിയ തീരുമാനം. കഴിഞ്ഞമാസം അവസാനത്തില്‍ സ്കൂളിലത്തെിയ എം.എല്‍.എയെ പുതിയ കെട്ടിടത്തില്‍ ക്ളാസ് മുറി ആവശ്യപ്പെട്ട് ഹയര്‍സെക്കന്‍ഡറി, ഹൈസ്കൂള്‍ വിദ്യാര്‍ഥികള്‍ വളഞ്ഞിരുന്നു. തുടര്‍ന്ന് പ്രശ്നം പരിഹരിക്കാമെന്ന് ഉറപ്പ് നല്‍കിയായിരുന്നു അദ്ദേഹം മടങ്ങിയത്. എം.എല്‍.എയുടെ നിര്‍ദേശ പ്രകാരം ചൊവ്വാഴ്ച സ്കൂള്‍ പി.ടി.എ പ്രവര്‍ത്തക സമിതി വിളിച്ചുചേര്‍ത്തെങ്കിലും യോഗത്തില്‍ ധാരണയുണ്ടായില്ല. തുടര്‍ന്നാണ് എം.എല്‍.എ വ്യാഴാഴ്ച സ്കൂളിലത്തെി പുതിയ തീരുമാനം അറിയിച്ചത്. ഷീറ്റ് വിരിച്ച് സീലിങ് നടത്തിയാണ് പുതിയ ക്ളാസ് മുറികള്‍ ഒരുക്കുകയെന്ന് എം.എല്‍.എ അറിയിച്ചു. ഫാനുകള്‍ ഘടിപ്പിക്കും. ടൈല്‍സ് വിരിച്ച് നിലം മോടി കൂട്ടും. 15 ലക്ഷം രൂപ വരെയാണ് ചെലവ് പ്രതീക്ഷിക്കുന്നത്. ഇത് പ്രാദേശിക വികസന നിധിയില്‍നിന്ന് അനുവദിക്കും. ഒന്നര മാസത്തിനകം നിര്‍മാണം പൂര്‍ത്തിയാക്കുന്നതിന് നടപടിയെടുക്കാന്‍ അദ്ദേഹം സ്കൂള്‍ പ്രിന്‍സിപ്പലിനോട് ആവശ്യപ്പെട്ടു. നിലവില്‍ ഒരു ക്ളാസ് മുറിയുടെ ക്ഷാമമാണ് ഹയര്‍സെക്കന്‍ഡറി നേരിടുന്നതെന്നും രണ്ട് മുറി പുതുതായി ലഭിക്കുന്നതോടെ ക്ളാസ്മുറികളുടെ അഭാവം പൂര്‍ണമായി പരിഹരിക്കപ്പെടുമെന്നും എം.എല്‍.എ മാധ്യമ പ്രവര്‍ത്തകരോട് പറഞ്ഞു. സ്കൂള്‍ വികസനത്തിന് മാസ്റ്റര്‍ പ്ളാന്‍ തയാറാക്കാന്‍ പി.ടി.എയോട് എം.എല്‍.എ ആവശ്യപ്പെട്ടു.