എടവണ്ണ കാന്‍സര്‍ സെന്‍റര്‍ അടുത്ത വര്‍ഷം പ്രവര്‍ത്തനമാരംഭിക്കും

എടവണ്ണ: നിര്‍ദിഷ്ട എടവണ്ണ കാന്‍സര്‍ സെന്‍റര്‍ അടുത്ത വര്‍ഷം ഫെബ്രുവരിയോടെ പ്രവര്‍ത്തനം ആരംഭിക്കുമെന്ന് പി.കെ. ബഷീര്‍ എം.എല്‍.എ. രണ്ട് കോടി രൂപ ചെലവിലാണ് ബഹുജന പങ്കാളിത്തത്തോടെ എടവണ്ണ കമ്മ്യൂണിറ്റി ഹെല്‍ത്ത് സെന്‍ററിനോട് ചേര്‍ന്ന് കാന്‍സര്‍ സെന്‍റര്‍ വരുന്നത്. തുടര്‍പ്രവര്‍ത്തനങ്ങള്‍ക്ക് രൂപം നല്‍കാന്‍ ആരോഗ്യവകുപ്പ് സെക്രട്ടറി ഡോ. കെ. ഇളങ്കോവന്‍ വ്യാഴാഴ്ച എടവണ്ണ ഹെല്‍ത്ത് സെന്‍ററിലത്തെി. ഇതോടനുബന്ധിച്ച് ‘കാന്‍സര്‍ കെയര്‍ ഇന്ന് കേരളത്തില്‍’ വിഷയത്തില്‍ സെമിനാറും സംഘടിപ്പിച്ചു. രോഗം കണ്ടുപിടിക്കാനും പ്രാഥമിക ചികിത്സക്കുമുള്ള സൗകര്യമാണ് സെന്‍ററിലുണ്ടാവുക. കീമോതെറപ്പി ഉള്‍പ്പെടെയുള്ള സൗകര്യം ഇവിടെ ഏര്‍പ്പെടുത്തുന്ന കാര്യം പരിഗണിക്കുമെന്ന് ഹെല്‍ത്ത് സെക്രട്ടറി ഡോ. ഇളങ്കോവന്‍ പറഞ്ഞു. പി.കെ. ബഷീര്‍ എം.എല്‍.എയുടെ ആസ്തി വികസന ഫണ്ടില്‍നിന്ന് ഒരുകോടി രൂപ ചെലവഴിച്ചാണ് കാന്‍സര്‍ സെന്‍ററിന് കെട്ടിടം നിര്‍മിക്കുന്നത്. രോഗ നിര്‍ണയത്തിനുള്ള ആധുനിക ഉപകരണങ്ങള്‍ സ്വകാര്യ വ്യക്തികള്‍ ആശുപത്രിക്ക് നല്‍കാമെന്ന് ഏറ്റിട്ടുണ്ടെന്ന് എം.എല്‍.എ പറഞ്ഞു. ആധുനിക എക്സ്റേ സംവിധാനം, മാമോഗ്രാഫി സംവിധാനം, ലാബ് എന്നിവ ഇതില്‍ ഉള്‍പ്പെടും. ജനകീയ സഹകരണത്തോടെയാണ് ആശുപത്രി പ്രവര്‍ത്തിക്കാനുള്ള ഫണ്ട് കണ്ടത്തെുക. മിതമായ നിരക്കില്‍ ഫീസ് വാങ്ങിയായിരിക്കും ചികിത്സ. പ്രമുഖ കാന്‍സര്‍ രോഗ വിദഗ്ധന്‍ ഡോ. എം. കൃഷ്ണന്‍ നായര്‍, മലബാര്‍ കാന്‍സര്‍ സെന്‍റര്‍ ഡയറക്ടര്‍ ഡോ. സതീശന്‍ എന്നിവര്‍ സെമിനാറിന് നേതൃത്വം നല്‍കി. മലപ്പുറം ഡി.എം.ഒ ഡോ. വി. ഉമ്മര്‍ ഫാറൂഖ്, എടവണ്ണ കമ്യൂണിറ്റി ഹെല്‍ത്ത് സെന്‍റര്‍ മെഡിക്കല്‍ ഓഫിസര്‍ ഡോ. സി.കെ. ജമീല, എടവണ്ണ പഞ്ചായത്ത് പ്രസിഡന്‍റ് വി. ശര്‍മിള, വൈസ് പ്രസിഡന്‍റ് റസിയ ബഷീര്‍, ഡോ. സി.പി. ഉമ്മര്‍കോയ, ഡോ. എന്‍. അബ്ബാസ് എന്നിവര്‍ സംബന്ധിച്ചു.