ഡോക്ടര്‍മാര്‍ അവധിയില്‍: അരീക്കോട് ഗവ. താലൂക്കാശുപത്രിയില്‍ ചികിത്സ കിട്ടാതെ രോഗികള്‍

അരീക്കോട്: ഗവ. താലൂക്കാശുപത്രിയില്‍ ഡോക്ടര്‍മാര്‍ അവധിയിലായത് രോഗികളെ വലച്ചു. ഡോക്ടര്‍മാരായ സന്തോഷ്, വിനില എന്നിവര്‍ പനി ബാധിച്ച് അവധിയിലായിരുന്നു. ഡോ. നൗഫല്‍ ആഴ്ചയിലെ അവധിയെടുക്കുകയും ചെയ്തു. ഒടുവില്‍ തൊള്ളായിരത്തോളം രോഗികളെ പരിശോധിക്കാന്‍ ഡോ. ഖാലിദ് മാത്രം. ബ്ളോക്ക് പ്രസിഡന്‍റും ജില്ലാ മെഡിക്കല്‍ ഓഫിസറും മറ്റും ഇടപെട്ട് പകരം ഡോക്ടര്‍മാരെ എത്തിച്ച് പ്രശ്നം പരിഹരിക്കുകയായിരുന്നു. ആഴ്ചയവധിയെടുത്ത ഡോ. നൗഫലിനെ തിരികെ വിളിക്കുകയും ഓമാനൂരില്‍നിന്നും മറ്റൊരു ഡോക്ടറെയും എത്തിക്കുകയും ചെയ്തത് രോഗികള്‍ക്ക് ആശ്വാസം പകര്‍ന്നു. ഇവിടെയുള്ള രണ്ട് ഡോക്ടര്‍ വര്‍ക്കിങ് അറേഞ്ച്മെന്‍റില്‍ മലപ്പുറത്തും പെരിന്തല്‍മണ്ണയിലും സേവനം ചെയ്യുന്നുണ്ട്. ആഴ്ചയില്‍ മൂന്നുദിവസം അവരുടെ സേവനവും ഉപയോഗപ്പെടുത്താറുണ്ടെന്ന് ആശുപത്രി അധികൃതര്‍ പറഞ്ഞു.