കുട്ടിപൊലീസ് ഇടപെട്ടു; ലഹരി ഉല്‍പന്ന വിതരണക്കാരന്‍ അറസ്റ്റില്‍

വണ്ടൂര്‍: ഉപജില്ലാ കായികമേളക്കിടെ വിദ്യാര്‍ഥികള്‍ക്ക് നിരോധിത ലഹരി വസ്തുക്കള്‍ വില്‍പന നടത്തിയയാളെ കുട്ടിപൊലീസിന്‍െറ ഇടപെടലിലൂടെ അറസ്റ്റ് ചെയ്തു. വണ്ടൂര്‍ തോട്ടുങ്ങല്‍ തേക്കുംകാട്ടില്‍ സുബ്രഹ്മണ്യനെയാണ് (45) വണ്ടൂര്‍ എസ്.ഐ എസ്.ആര്‍. സനീഷ്കുമാറിന്‍െറ നേതൃത്വത്തിലുള്ള സംഘം അറസ്റ്റ് ചെയ്തത്. വണ്ടൂര്‍ വി.എം.സി സ്കൂള്‍ മൈതാനത്ത് നടക്കുന്ന ഉപജില്ലാ സ്കൂള്‍ കായികമേളക്കിടെയാണ് സ്റ്റുഡന്‍റ് പൊലീസ് കേഡറ്റുകള്‍ ഹാന്‍സ് ഉപയോഗിക്കുന്ന ഏതാനും വിദ്യാര്‍ഥികളെ പിടികൂടിയത്. ഇവരെ സ്ഥലത്തുണ്ടായിരുന്ന എ.എസ്.ഐ കെ. ബഷീര്‍, സ്റ്റുഡന്‍റ് പൊലീസ് സി.പി.ഒ എന്നിവര്‍ ചോദ്യം ചെയ്തപ്പോഴാണ് വിതരണം നടത്തിയായളെ കുറിച്ച് വിവരം ലഭിച്ചത്. ഉടന്‍ എസ്.ഐ സ്ഥലത്തത്തെി സ്കൂള്‍ വളപ്പിന് സമീപത്തുണ്ടായിരുന്ന സുബ്രഹ്മഹ്ണ്യനെ കസ്റ്റഡിയിലെടുത്തു ദേഹപരിശോധന നടത്തിയപ്പോള്‍ ഹാന്‍സിന്‍െറ 20 പാക്കറ്റുകള്‍ കണ്ടെടുത്തു. പ്രതിയെ കുടുക്കിയ സ്റ്റുഡന്‍റ് പോലീസ് കേഡറ്റുകളെ എസ്.ഐ അഭിനന്ദിച്ചു.