തിരൂര്‍ ആര്‍.ഡി ഓഫിസ്: കെട്ടിക്കിടക്കുന്ന ഫയലുകള്‍ ഉടന്‍ തീര്‍പ്പാക്കണമെന്ന് ആവശ്യം

തിരൂര്‍: ആര്‍.ഡി ഓഫിസില്‍ വൈകിയുള്ള ജനന രജിസ്ട്രേഷന്‍ സംബന്ധമായ ഫയലുകളടക്കം നിരവധി ഫയലുകള്‍ കെട്ടിക്കിടക്കുന്നു. തീര്‍പ്പാക്കാനുള്ള അദാലത്തുകളില്‍ ഫയലുകള്‍ ഉള്‍പ്പെടുത്താതെ ഉദ്യോഗസ്ഥര്‍ ജനങ്ങളെ ബുദ്ധിമുട്ടിക്കുന്നതായി പരാതി. സര്‍ട്ടിഫിക്കറ്റുകള്‍ ശരിയാക്കാന്‍ വരുന്നവരോട് പല കാരണങ്ങള്‍ പറഞ്ഞ് മടക്കി അയക്കുന്നത് പതിവാണ്. അപേക്ഷകരും ഉദ്യോഗസ്ഥരും തമ്മില്‍ വാക്കുതര്‍ക്കങ്ങള്‍ ഇവിടെ പതിവാണ്. ഫയലുകള്‍ തീര്‍പ്പാക്കാന്‍ വലിയ തുക ആവശ്യപ്പെടുന്ന ഏജന്‍റുമാരുണ്ടെന്നും പണം കൊടുക്കാത്തവരുടെ ഫയലുകള്‍ പൂഴ്ത്തി വെക്കുകയാണെന്നും അപേക്ഷകര്‍ ആരോപിച്ചു. പ്രസ്തുത വിഷയങ്ങള്‍ നിരവധി തവണ അധികൃതരുടെ ശ്രദ്ധയില്‍പെടുത്തിയെങ്കിലും വേണ്ട പരിഗണന നല്‍കിയില്ല. ഇത്തരത്തിലുള്ള അഴിമതി ഉടന്‍ അവസാനിപ്പിച്ചില്ളെങ്കില്‍ ശക്തമായ സമരം സംഘടിപ്പിക്കുമെന്നും സേവനാവകാശ നിയമ പ്രകാരം ജില്ലാ കലക്ടര്‍ക്ക് പരാതി നല്‍കുമെന്നും സി.പി.ഐ തിരൂര്‍ ലോക്കല്‍ കമ്മിറ്റി സെക്രട്ടറി എം. ദിനേശന്‍ പറഞ്ഞു.