അടിയന്തര ചികിത്സ വേണം ആരോഗ്യ വിഭാഗത്തിന്

കൊണ്ടോട്ടി: കൊണ്ടോട്ടിയില്‍ കഴിഞ്ഞ ഒരു വര്‍ഷത്തിനുള്ളില്‍ കൊണ്ടോട്ടിയിലും പരിസര പഞ്ചായത്തിലും റിപ്പോര്‍ട്ട് ചെയ്തത് 86 ഡെങ്കിപ്പനിയായിരുന്നു. രണ്ട് മലേറിയയും. ഇവരെല്ലാവരും ജോലി സംബന്ധമായോ മറ്റോ ഏറെനേരം ബന്ധപ്പെടുന്നത് കൊണ്ടോട്ടി ടൗണിലാണ്. ഇവിടെയുള്ള ഓരോ കെട്ടിടങ്ങളിലും മാലിന്യം അടിഞ്ഞുകൂടി കിടക്കുന്നു. വൃത്തിയില്ളെന്ന് മാത്രമല്ല, ടാങ്കുകളിലെ വെള്ളത്തില്‍ കാക്കകള്‍ വരെ ചത്ത് മാസങ്ങളോളം അതേ വെള്ളം കുടിക്കേണ്ടി വന്നിട്ടും കെട്ടിട ഉടമകള്‍ക്ക് ഒരു കൂസലുമില്ല. ബസ്സ്റ്റാന്‍ഡില്‍ ഓരോ മൂലയിലും മാലിന്യക്കൂമ്പാരമാണ്. വര്‍ഷങ്ങളായി ഇവിടങ്ങള്‍ വൃത്തിയാക്കിയിട്ട്. തങ്ങള്‍സ് റോഡിലും ബൈപ്പാസ് റോഡിലെ മറ്റു കെട്ടിടങ്ങളിലുമെല്ലാം സ്ഥിതി ഇതുതന്നെയാണ്. ആരോഗ്യ വിഭാഗം ഒരു തവണപോലും ഇവിടെ സന്ദര്‍ശിക്കുന്നില്ല. ഇതര സംസ്ഥാന തൊഴിലാളികള്‍ മാലിന്യം പരത്തുന്നതായി ആരോപണമുയര്‍ന്നതിനെ തുടര്‍ന്ന് നാട്ടുകാര്‍ നിരവധി പേരെ ഇവിടെനിന്ന് ഓടിച്ചിരുന്നു. നഗരത്തിലെ കെട്ടിടങ്ങളില്‍ പരിശോധന നടത്താതെ തട്ടിക്കൂട്ട് പരിപാടികളിലാണ് ആരോഗ്യവകുപ്പ്. ഹോട്ടല്‍ പ്രവര്‍ത്തനം തോന്നിയ പോലെ കൊണ്ടോട്ടി: ആരോഗ്യ വിഭാഗത്തിന് ജനങ്ങളുടെ ആരോഗ്യത്തില്‍ ഉത്തരവാദിത്തമില്ലാത്തതുകൊണ്ടാണ് ഹോട്ടലുകള്‍ തോന്നിയപോലെ പ്രവര്‍ത്തിക്കുന്നത്. ശുചിത്വമില്ലായ്മ, മായം ചേര്‍ക്കല്‍, കെമിക്കലുകളുടെ ഉപയോഗം എന്നിവ തടയാന്‍ നടപടിയില്ല. ചില ഹോട്ടലുകളില്‍ 14 വയസ്സായ ഇതര സംസ്ഥാന കുട്ടികള്‍ വരെ ജോലി ചെയ്യുന്നു. തീരെ വൃത്തിയില്ലാത്ത ഹോട്ടലുകളില്‍ മായം കുറവാണെങ്കില്‍ ചില വന്‍ ഹോട്ടലുകളില്‍ മനുഷ്യനെ നിത്യരോഗിയാക്കുന്ന പദാര്‍ഥങ്ങളാണ് ഭക്ഷണങ്ങളില്‍ ഉപയോഗിക്കുന്നത്. എപ്പോഴെങ്കിലും പേരിന് റെയ്ഡ് നടത്തി ചെറിയ പിഴ ചുമത്തുന്നതില്‍ ഒതുങ്ങുന്നു അധികൃതരുടെ നടപടി. പാവപ്പെട്ടവന്‍െറ ഹോട്ടലില്‍ രണ്ടു തവണ കയറിയിറങ്ങുമ്പോള്‍ മാരക വിഷങ്ങള്‍ ചേര്‍ത്ത ഭക്ഷണം നല്‍കുന്ന മെഗാ ഹോട്ടലുകളില്‍ കാര്യമായ പരിശോധന നടക്കാറില്ല.