മങ്കട ഗവ. ഹൈസ്കൂള്‍ കെട്ടിട നിര്‍മാണം പൂര്‍ത്തിയായില്ല

മങ്കട: 2014 ജനുവരിയില്‍ ശിലാസ്ഥാപനം നിര്‍വഹിച്ച് പ്രവൃത്തി തുടങ്ങിയ മങ്കട ഗവ. ഹൈസ്കൂള്‍ പുതിയ കെട്ടിടം ഇതുവരെ പൂര്‍ത്തിയായില്ല. ഒരു കോടി രൂപ ചെലവില്‍ നിര്‍മിക്കുന്ന കെട്ടിടത്തിനുവേണ്ടി നിലവിലുണ്ടായിരുന്ന പഴയ രണ്ട് കെട്ടിടങ്ങളാണ് പൊളിച്ചുമാറ്റിയത്. ഇതുകാരണം ക്ളാസ് മുറികള്‍ വളരെ പ്രയാസപ്പെട്ടാണ് നടക്കുന്നത്. 2014 ജനുവരി 18നാണ് ഇ. അഹമ്മദ് എം.പി പുതിയ കെട്ടിടത്തിന് ശിലയിട്ടത്. വിദ്യാര്‍ഥികളുടെ ബാഹുല്യവും സ്ഥലപരിമിതിയുംമൂലം വീര്‍പ്പുമുട്ടുന്ന അവസ്ഥയിലായതിനെ തുടര്‍ന്നാണ് മങ്കട ഗവ. ഹയര്‍ സെക്കന്‍ഡറി സ്കൂളില്‍ ഹൈസ്കൂള്‍ ക്ളാസിനായി പുതിയ കെട്ടിടം അനുവദിച്ചത്. ടി.എ. അഹമ്മദ് കബീര്‍ എം.എല്‍.എയുടെ ആസ്തി വികസന ഫണ്ടില്‍നിന്നാണ് ഒരു കോടി രൂപ പുതിയ കെട്ടിടം നിര്‍മിക്കുന്നതിന് അനുവദിച്ചത്. ഇതോടൊപ്പം മണ്ഡലത്തിലെ മൊത്തം അഞ്ച് സ്കൂളുകള്‍ക്ക് കെട്ടിടം നിര്‍മിക്കാന്‍ തുക നല്‍കി. ഇതില്‍ മങ്കടയൊഴികെ എല്ലാ കെട്ടിടങ്ങളും കഴിഞ്ഞ വര്‍ഷം തന്നെ പൂര്‍ത്തിയായി ക്ളാസ് തുടങ്ങി. മൂവായിരത്തോളം വിദ്യാര്‍ഥികള്‍ പഠിക്കുന്ന സ്കൂളില്‍ പല ക്ളാസ് മുറികളും വളരെ പ്രയാസപ്പെട്ടാണ് നടക്കുന്നത്. പ്രത്യേക പരിഗണന അര്‍ഹിക്കുന്ന (ഐ.ഇ.ഡി) വിദ്യാര്‍ഥികള്‍ക്ക് മാത്രമായി ജില്ലാ പഞ്ചായത്ത് നിര്‍ദേശിച്ച രണ്ട് ക്ളാസ്സ് മുറികളില്‍കൂടി ഇപ്പോള്‍ സാധാരണ ക്ളാസ് നടക്കുകയാണ്. ഇക്കാരണത്താല്‍ പ്രത്യേക പരിഗണന അര്‍ഹിക്കുന്നവര്‍ അവഗണനയിലാണ്. ഇവര്‍ക്കായി പ്രത്യേകം രണ്ട് അധ്യാപകരും സ്കൂളിലുണ്ട്. എട്ടാം ക്ളാസിന്‍െറ രണ്ട് ഡിവിഷനുകള്‍ നടക്കുന്നത് പഴയ ബില്‍ഡിങ്ങില്‍നിന്ന് ഇറക്കിക്കെട്ടിയ ഷെഡിലാണ്. ഹയര്‍ സെക്കന്‍ഡറി വിഭാഗം താങ്ങാവുന്നതിലധികം കുട്ടികളുമായി അശാസ്ത്രീയമായ ക്ളാസ് മുറികളിലാണ് പഠനം നടത്തുന്നത്.