കോടികള്‍ ‘വെള്ളത്തില്‍’

ചങ്ങരംകുളം: കോള്‍മേഖലയിലെ പ്രധാന ലിഫ്റ്റ് ഇറിഗേഷന്‍ പദ്ധതികളിലൊന്നായ പന്താവൂര്‍ ലിഫ്റ്റ് ഇറിഗേഷന്‍ പദ്ധതി അവതാളത്തില്‍. പദ്ധതി പുനര്‍നിര്‍മാണത്തിന് കോടികള്‍ മുടക്കിയിട്ടും പ്രവര്‍ത്തനം തുടങ്ങാത്ത അവസ്ഥയാണ്. 1979ല്‍ പ്രദേശത്തെ കര്‍ഷകര്‍ മഞ്ചേരി ഇറിഗേഷന് മുന്നില്‍ സമരം നടത്തിയതിനെ തുടര്‍ന്നാണ് 1982ല്‍ സര്‍ക്കാര്‍ പമ്പ് ഹൗസും ഇറിഗേഷന്‍ സംവിധാനവും വെള്ളം കെട്ടിനിര്‍ത്താനുള്ള ചിറയും സ്ഥാപിച്ചത്. തുടര്‍ന്ന് ഏറെ വര്‍ഷം നല്ലനിലയില്‍ പ്രവര്‍ത്തിക്കുകയും പിന്നീട് യന്ത്രസാമഗ്രികള്‍ കാലഹരണപ്പെടുകയുമായിരുന്നു. പ്രദേശത്തെ 100ല്‍പരം ഏക്കര്‍ കൃഷിയിടങ്ങളിലെ പുഞ്ചകൃഷിക്കും പ്രദേശത്തെ വരള്‍ച്ചക്കും ഏറെ സഹായകമായ പദ്ധതിയുടെ പുനര്‍നിര്‍മാണം അഞ്ചുവര്‍ഷംമുമ്പ് 2.15 കോടി രൂപ ചെലവഴിച്ച് നടത്തിയിരുന്നു. തച്ചുപറമ്പ് അട്ടയിക്കുന്ന്, അച്ചായത്ത്കുന്ന്, പന്താവൂര്‍കുന്ന്, കൊടക്കാട്ട്കുന്ന്, കക്കിടിക്കല്‍, കക്കിടിപ്പുറം, പന്താവൂര്‍, കക്കിടിപ്പുറം പ്രദേശങ്ങളിലെ രൂക്ഷമായ വരള്‍ച്ചക്കും ഇടവിള കൃഷിക്കും ഗുണകരമായ പദ്ധതിയുടെ പുനര്‍നിര്‍മാണം കഴിഞ്ഞിട്ടും അധികൃതരുടെ അനാസ്ഥമൂലം പ്രവര്‍ത്തനം തുടങ്ങാനായില്ല. പമ്പ്ഹൗസ് നിര്‍മാണം, മോട്ടോര്‍ ഫിറ്റിങ്, വൈദ്യുതീകരണം, കനാല്‍ നിര്‍മാണം, തടയണ നിര്‍മാണം തുടങ്ങിയ എല്ലാ പ്രവര്‍ത്തനങ്ങളും പൂര്‍ത്തീകരിച്ചിട്ടുണ്ട്. 60 കുതിരശക്തിയുള്ള മൂന്ന് മോട്ടോറുകളും പമ്പിങ് സാമഗ്രികളും പൂര്‍ണമായി സജ്ജമായിട്ടും ജലസേചന വകുപ്പ് രേഖകളും എസ്റ്റിമേറ്റും സമയബന്ധിതമായി നല്‍കാത്തതിനാല്‍ പദ്ധതി പഴയപടി കിടക്കുകയാണ്. ട്രാന്‍സ്ഫോര്‍മര്‍ സ്ഥാപിക്കുന്നതിനും അനുബന്ധ ചെലവുകള്‍ക്കും ആവശ്യമായ പണം നല്‍കാന്‍ കഴിഞ്ഞ ജില്ലാ പഞ്ചായത്ത് ഭരണസമിതി തയാറായിട്ടും അനുബന്ധരേഖകളും എസ്റ്റിമേറ്റും നല്‍കുന്നതില്‍ അധികൃതര്‍ അനാസ്ഥ കാണിച്ചു. ജില്ലാ പഞ്ചായത്ത് പല പ്രാവശ്യം എസ്റ്റിമേറ്റ് ആവശ്യപ്പെട്ടിട്ടും നല്‍കാന്‍ തയാറാകാത്ത അധികൃതരുടെ അനാസ്ഥയാണ് ഈ ദുരവസ്ഥക്ക് കാരണം. പദ്ധതി ഉടന്‍ ആരംഭിക്കാത്തപക്ഷം ബഹുജന പ്രക്ഷോഭത്തിനൊരുങ്ങുകയാണ് നാട്ടുകാര്‍.