പരപ്പനങ്ങാടിയില്‍ തെരുവുനായ ശല്യം രൂക്ഷം

പരപ്പനങ്ങാടി: പരപ്പനങ്ങാടിയെ തെരുവുനായകള്‍ വിറപ്പിക്കുന്നു. വീടുകളില്‍നിന്ന് പുറത്തിങ്ങാനാവാത്ത വിധം നായക്കൂട്ടങ്ങള്‍ വഴിയോരങ്ങള്‍ കീഴടക്കിയിരിക്കുകയാണ്. പ്രഭാത പ്രാര്‍ഥനക്ക് പോകുന്നവരും രാത്രി മദ്റസ കഴിഞ്ഞ് വരുന്ന വിദ്യാര്‍ഥികളും ഭീതിയിലാണ്. രാത്രി തനിച്ച് കാല്‍നട യാത്ര ചെയ്യുന്നവരെ ഇരുളില്‍ മറഞ്ഞിരിക്കുന്ന നായക്കൂട്ടങ്ങള്‍ വളയുന്നത് നിത്യ സംഭവമായിട്ടുണ്ട്. തെരുവുനായ ശല്യത്തിന് അറുതിതേടി അധികാരികളെ സമീപിക്കാന്‍ തുടങ്ങിയിട്ട് വര്‍ഷങ്ങളായെങ്കിലും സാങ്കേതിക നിസ്സഹായത ചൂണ്ടിക്കാട്ടി അധികാരികള്‍ കൈമലര്‍ത്തുകയായിരുന്നു. എന്നാല്‍, ആക്രമണ സ്വഭാവമുള്ള നായകളെ കൈകാര്യം ചെയ്യാമെന്ന കോടതി നിരീക്ഷണങ്ങളടക്കമുണ്ടായിട്ടും തദ്ദേശ സ്ഥാപനങ്ങള്‍ മൗനം തുടരുന്നതില്‍ വ്യാപക പ്രതിഷേധമുണ്ട്. അതേസമയം, വിഷയത്തിന്‍െറ ഗൗരവം ഉള്‍ക്കൊള്ളുന്നതായും മൃഗ വകുപ്പുമായി ബന്ധപ്പെട്ട് പ്രത്യേക പദ്ധതി നടപ്പാക്കാന്‍ ആലോചിക്കുന്നതായും പരപ്പനങ്ങാടി നഗരസഭ അധ്യക്ഷ വി.വി. ജമീല ‘മാധ്യമ’ത്തോട് പറഞ്ഞു.