പുല്‍പറ്റയിലും കാവനൂരിലും വ്യാപക വയല്‍ നികത്തല്‍

പുല്‍പറ്റ: പുല്‍പറ്റയില്‍ കരിപ്പാലി ഭാഗത്തും കാവനൂരില്‍ സ്രാമ്പിക്കല്‍ ഭാഗത്തും വ്യാപക വയല്‍നികത്തല്‍ നടക്കുന്നതായി നാട്ടുകാര്‍ ജില്ലാ കലക്ടര്‍ക്ക് പരാതി നല്‍കി. രണ്ടിടത്തേയും വില്ളേജ് ഓഫിസര്‍മാരോട് പരാതിപ്പെട്ടിട്ടും തിരിഞ്ഞുനോക്കാനോ നടപടിയെടുക്കാനോ മുതിര്‍ന്നിട്ടില്ല. ഇരിപ്പൂകൃഷി ചെയ്യുന്ന വയലാണ് മണ്ണിട്ട് മൂടുന്നത്. വയല്‍നികത്തുന്നവരുടെ പേരുവിവരങ്ങള്‍ സഹിതമാണ് നേരത്തെ റവന്യൂ ഉദ്യോഗസ്ഥരെ അറിയിച്ചത്. കലക്ടര്‍ക്ക് പരാതി നല്‍കിയതറിഞ്ഞതോടെ പുല്‍പറ്റയില്‍ വില്ളേജ് അധികൃതര്‍ സ്ഥലപരിശോധന നടത്തി. മഞ്ചേരി-കിഴിശേരി റോഡില്‍ പുല്‍പറ്റ വില്ളേജ് പരിധിയിലെ കുന്നിടിച്ചാണ് മണ്ണ് കടത്തുന്നത്. റവന്യൂ ഉദ്യോഗസ്ഥരുടെ ഒത്താശയോടെയാണിതെന്നും ജില്ലാ കലക്ടര്‍ക്ക് നല്‍കിയ പരാതിയില്‍ ചൂണ്ടിക്കാട്ടി. മുത്തന്നൂര്‍ പൊത്തംകോട് പ്രദേശവാസികള്‍ ഒപ്പിട്ടാണ് പരാതി നല്‍കിയത്. ഏറനാട് താലൂക്ക് ഓഫിസിലെ ഓഫിസര്‍മാരോട് നേരത്തെ ഇതു സംബന്ധിച്ച് പ്രദേശവാസികള്‍ പരാതി പറഞ്ഞിരുന്നു. എന്നാല്‍, പ്രദേശത്തുകാര്‍ സംഘടിച്ച് എതിര്‍ക്കുകയാണെങ്കില്‍ മാത്രം ഇടപെടാമെന്ന് പറഞ്ഞ് ഉദ്യോഗസ്ഥരും ഒഴിഞ്ഞുമാറുകയായിരുന്നു.