പട്ടയം ലഭിച്ച് ആറുവര്‍ഷം കഴിഞ്ഞിട്ടും ഭൂമി പതിച്ചുനല്‍കിയില്ളെന്ന്

തിരുനാവായ: പട്ടയം കിട്ടി ആറുവര്‍ഷം കഴിഞ്ഞിട്ടും ഭൂമി അളന്നുതിട്ടപ്പെടുത്തി പതിച്ചുനല്‍കാത്തതിനാല്‍ കുടുംബങ്ങള്‍ ദുരിതത്തില്‍. 2009 നവംബര്‍ 24ന് നിലമ്പൂരില്‍ നടന്ന അദാലത്തിലാണ് 16 കുടുംബങ്ങള്‍ക്ക് കൊടക്കല്‍ അഴകത്തുകളം മിച്ചഭൂമിയില്‍ പട്ടയം ലഭിച്ചത്. പിന്നീട് ഇവരില്‍ ഒരു അങ്കണവാടിയുള്‍പ്പെടെ പത്ത് പേര്‍ക്ക് റവന്യൂ അധികൃതര്‍ സ്ഥലം അളന്നു കൊടുത്തെങ്കിലും ആറ് കുടുംബങ്ങള്‍ ഇപ്പോഴും ഭൂമി കിട്ടാതെ വാടക ക്വാര്‍ട്ടേഴ്സുകളിലും കുടുംബ വീടുകളിലുമായാണ് ജീവിതം തള്ളിനീക്കുന്നത്. 95 സെന്‍റ് സ്ഥലമാണ് 16 കുടുംബങ്ങള്‍ക്കും അങ്കണവാടിക്കുമായി അനുവദിച്ചത്. ഇതിനിടയില്‍ ഈ സ്ഥലത്ത് അവകാശവാദവുമായി സ്വകാര്യ വ്യക്തി ലാന്‍ഡ് ട്രൈബ്യൂണല്‍ മുമ്പാകെയും കോടതിയിലും അപേക്ഷ നല്‍കിയതാണ് കുടുംബങ്ങള്‍ക്കും അങ്കണവാടിക്കും സ്ഥലം അളന്നുകിട്ടാന്‍ തടസ്സമായി നില്‍ക്കുന്നത്. പല തവണ അപേക്ഷ തള്ളിയെങ്കിലും ഈ സമയത്ത് പെട്ടെന്ന് ഭൂമി അളന്നു തിട്ടപ്പെടുത്തികൊടുക്കാന്‍ വരുന്ന കാലതാമസത്തില്‍ സ്വകാര്യ വ്യക്തി വീണ്ടും കോടതിയെ സമീപിക്കുന്നതാണ് കുടുംബങ്ങള്‍ക്ക് വിനയാകുന്നത്. ഏറെക്കാലത്തെ മുറവിളിക്ക് ശേഷമാണ് നിര്‍ധനരായ കുടുംബങ്ങള്‍ക്ക് ഭൂമി പതിച്ചുകിട്ടിയത്. അങ്കണവാടിക്ക് പല തവണ പണം പാസായിട്ടും ഭൂമി പതിച്ചുകിട്ടാത്തതിനാല്‍ കെട്ടിടം നിര്‍മിക്കാനാവുന്നില്ല. ഇതുമൂലം അങ്കണവാടി കുട്ടികള്‍ക്ക് ഞെരുങ്ങിയ കെട്ടിടത്തിലിരുന്ന് സമയം കഴിക്കേണ്ടതായ സ്ഥിതിയാണ്.