മെഡിക്കല്‍ കോളജില്‍ 150 രോഗികള്‍ക്ക് കക്കൂസ് ഒന്ന്

മഞ്ചേരി: മെഡിക്കല്‍ കോളജ് ആശുപത്രിയില്‍ ശസ്ത്രക്രിയക്ക് വിധേയരായവരടക്കം 150ഓളം രോഗികളും കൂട്ടിരിപ്പുകാരും ഉള്ള വാര്‍ഡുകളില്‍ പ്രാഥമിക കൃത്യത്തിന് കക്കൂസ് മുറി ഒന്ന്. കുട്ടികളുടെയും സര്‍ജറി വാര്‍ഡിലുമുള്ള രോഗികളാണ് ദുരിതത്തിലായത്. പുലര്‍ച്ചെ നാലുമുതല്‍ സ്ത്രീകള്‍ കുട്ടികളുമായി കക്കൂസിന് മുമ്പില്‍ വരിനിന്ന് വലയുകയാണ്. രണ്ടുവര്‍ഷമായി ഈ സ്ഥിതി തുടങ്ങിയിട്ട്. ഡോ. കെ.വി. നന്ദകുമാര്‍ ആശുപത്രി സൂപ്രണ്ടായി ചുമതലയേറ്റ ശേഷം പലപ്പോഴായി ഇക്കാര്യം പറഞ്ഞിരുന്നെങ്കിലും പരിശോധിക്കാന്‍ കൂടി തയാറായിട്ടില്ളെന്ന് രോഗികള്‍ പറയുന്നു. വാര്‍ഡിന്‍െറ ചുമതലയില്‍ മാറിമാറി വരുന്ന നഴ്സിങ് ജീവനക്കാരോട് പരാതിപ്പെടുമ്പോള്‍ ആശുപത്രി സൂപ്രണ്ടിനെ കാണാന്‍ പറഞ്ഞ് കൈയൊഴിയുകയാണ്. നാലു കുളിമുറികളും നാലു കക്കൂസ് മുറികളുമുള്ളതില്‍ ഏഴെണ്ണവും ചെറിയ കാരണങ്ങള്‍ കൊണ്ട് അടച്ചിട്ടിരിക്കുകയാണ്. ഭക്ഷണാവശിഷ്ടങ്ങളും മറ്റും അടിഞ്ഞ് കേടുവന്നവയാണ് ഇവ. കെട്ടിട നവീകരണത്തോടൊപ്പം ഇവയും ശരിയാക്കുമെന്നായിരുന്നു ആശുപത്രി സൂപ്രണ്ട് പറഞ്ഞിരുന്നത്. എന്നാല്‍, കെട്ടിടം ഒരുകോടി രൂപ മുടക്കി അറ്റകുറ്റപ്പണി നടത്തിയപ്പോഴും ഇത് നന്നാക്കിയില്ല. പഴയ കെട്ടിടത്തില്‍ മുകള്‍ നിലയില്‍ മാത്രമാണ് ഇപ്പോള്‍ രോഗികളെ കിടത്തുന്നത്. പ്രസവവാര്‍ഡ്, പ്രസവം നിര്‍ത്തുന്നവരുടെ വാര്‍ഡ്, മനോരോഗികളുടെ വാര്‍ഡ്, ശസ്ത്രക്രിയ വാര്‍ഡ്, കുട്ടികളുടെ വാര്‍ഡ് എന്നിങ്ങനെ 250ഓളം പേരുണ്ടിതില്‍. നവജാതശിശുക്കളുടെ ഐ.സിയുവും ഇതിലാണ്. കുട്ടികളുടെ അവകാശങ്ങളെക്കുറിച്ച് ബോധവത്കരണം നടത്തുന്ന സര്‍ക്കാര്‍ ഏജന്‍സികളും ചൈല്‍ഡ് വെല്‍ഫെയര്‍ കമ്മിറ്റികളും പോലും കുട്ടികളുടെ ദുരിതം കാണുന്നില്ളെന്ന് അമ്മമാര്‍ പറയുന്നു. ആഴ്ചയില്‍ ഒരുദിവസമെങ്കിലും ആശുപത്രി സൂപ്രണ്ട് വാര്‍ഡുകളില്‍ എത്തുന്ന സ്ഥിതിയുണ്ടായാല്‍ ഇത്തരം പ്രശ്നങ്ങള്‍ക്ക് കുറേയെങ്കിലും പരിഹാരം ഉണ്ടാകുമെന്ന് അമ്മമാര്‍ ചൂണ്ടിക്കാട്ടുന്നു.