മരണത്തിന് മുമ്പ് സേതുമാധവന്‍ എഴുതിവെച്ചു, പൊന്‍വെളിച്ചത്തിന്‍െറ മാതൃക

പെരിന്തല്‍മണ്ണ: മരണത്തിന് മുമ്പ് മുന്‍ പ്രധാനാധ്യാപകന്‍ എഴുതിവെച്ചത് നാടിന് വെളിച്ചം പകരുന്ന മാതൃക. മരണശേഷം ഭൗതികശരീരം മഞ്ചേരി മെഡിക്കല്‍ കോളജ് വിദ്യാര്‍ഥികള്‍ക്ക് പഠനത്തിനും കണ്ണുകള്‍ പെരിന്തല്‍മണ്ണ അല്‍സലാമ ആശുപത്രിയിലേക്കും നല്‍കണമെന്ന് എഴുതിവെച്ചാണ് പാതായ്ക്കര പുത്തന്‍വീട്ടില്‍ സേതുമാധവന്‍ (65) വിട പറഞ്ഞത്. ചൊവ്വാഴ്ച പുലര്‍ച്ചെയാണ് ഹൃദയസ്തംഭനത്തെ തുടര്‍ന്ന് സേതുമാധവന്‍ മരിച്ചത്. പെരിന്തല്‍മണ്ണയിലെ സാമൂഹിക സേവനമേഖലയില്‍ നിറസാന്നിധ്യമായിരുന്നു. മുന്‍കാല അധ്യാപക സംഘടനയായ കെ.ജി.പി.ടി.എ, കെ.ജി.ടി.എ എന്നിവയുടെയും കെ.എസ്.ടി.എയുടെയും നേതൃനിരയിലുണ്ടായിരുന്നു. ശാസ്ത്രസാഹിത്യ പരിഷത്ത് മേഖലാ പ്രസിഡന്‍റായും പ്രവര്‍ത്തിച്ചു. പാതായ്ക്കര എ.യു.പി സ്കൂള്‍ അധ്യാപകനായി സേവനം തുടങ്ങിയ സേതുമാധവന്‍ പെരിന്തല്‍മണ്ണ ഗവ. ഹൈസ്കൂള്‍, താഴെക്കോട് ഗവ. എല്‍.പി സ്കൂള്‍ എന്നിവിടങ്ങളില്‍ അധ്യാപകനായി. പെരിന്തല്‍മണ്ണ ഗവ. പഞ്ചമ സ്കൂളിലെ പ്രഥമാധ്യാപകനായി 12 വര്‍ഷം മുമ്പാണ് വിരമിച്ചത്. ബുധനാഴ്ച രാവിലെ മൃതദേഹം മഞ്ചേരി മെഡിക്കല്‍ കോളജിന് കൈമാറും.