ഇരുമുന്നണികളും വെല്‍ഫെയര്‍ പാര്‍ട്ടിയും ഒന്നിച്ചു; പാലക്കാട്ട് ബി.ജെ.പിക്ക് സ്ഥിരംസമിതി നഷ്ടമായി

പാലക്കാട്: യു.ഡി.എഫും എല്‍.ഡി.എഫും വെല്‍ഫെയര്‍ പാര്‍ട്ടിയും ഒന്നിച്ചതോടെ പാലക്കാട് നഗരസഭയിലെ സ്റ്റാന്‍ഡിങ് കമ്മിറ്റി അംഗങ്ങളുടെ തെരഞ്ഞെടുപ്പില്‍ ബി.ജെ.പി ഒൗട്ടായി. സംസ്ഥാനത്ത് ബി.ജെ.പി ഭരിക്കുന്ന ഏക നഗരസഭയാണിത്. 52 അംഗ നഗരസഭ കൗണ്‍സിലില്‍ 24 സീറ്റുകള്‍ കരസ്ഥമാക്കിയ ബി.ജെ.പിയാണ് ഏറ്റവും വലിയ ഒറ്റകക്ഷി. യു.ഡി.എഫിന് 17ഉം എല്‍.ഡി.എഫിന് ഒമ്പതും പേരുടെ പിന്തുണയുണ്ട്. ഒരു സീറ്റില്‍ വെല്‍ഫെയര്‍ പാര്‍ട്ടിയും ശേഷിച്ച ഒന്നില്‍ ലീഗ് വിമതനുമാണ്. ഇടത്-വലത് മുന്നണികള്‍ വേറിട്ട് മത്സരിച്ചതിനാല്‍ ചെയര്‍പേഴ്സന്‍, വൈസ് ചെയര്‍മാന്‍ സ്ഥാനത്തേക്ക് വിജയിച്ചത് ബി.ജെ.പിയാണ്. ചൊവ്വാഴ്ച സ്ഥിരം സമിതികളിലേക്ക് ആകെ 44 അംഗങ്ങളെ തെരഞ്ഞെടുത്തപ്പോള്‍ ബി.ജെ.പിക്ക് 16 അംഗങ്ങളെ മാത്രമാണ് ലഭിച്ചത്. ബി.ജെ.പിക്കെതിരെ കക്ഷിവ്യത്യാസം മറന്ന് മറ്റംഗങ്ങള്‍ ഒരുമിച്ചതാണ് കാരണം. വികസനം, പൊതുമരാമത്ത്, ആരോഗ്യം, വിദ്യാഭ്യാസം, ധനകാര്യം സ്റ്റാന്‍ഡിങ് കമ്മിറ്റികളിലെല്ലാം പ്രതിപക്ഷത്തിനാണ് ആധിപത്യം. വികസനകാര്യ സ്റ്റാന്‍ഡിങ് കമ്മിറ്റിയില്‍ യു.ഡി.എഫ്, ബി.ജെ.പി കക്ഷികള്‍ക്ക് നാലുവീതം അംഗങ്ങളും ഇടതുപക്ഷത്തിന് ഒരംഗവും ലഭിച്ചു. ക്ഷേമകാര്യ വിഭാഗത്തില്‍ യു.ഡി.എഫിന് മൂന്നും ബി.ജെ.പിക്ക് നാലും എല്‍.ഡി.എഫിന് രണ്ടും അംഗങ്ങളെ വിജയിപ്പിക്കാനായി. ആരോഗ്യ സ്റ്റാന്‍ഡിങ് കമ്മിറ്റിയില്‍ യു.ഡി.എഫിനും ബി.ജെ.പിക്ക് മൂന്ന് വീതവും ഇടതുമുന്നണിക്ക് രണ്ടും അംഗങ്ങളെ ലഭിച്ചു. ധനകാര്യ വിഭാഗത്തില്‍ സ്വതന്ത്രന്‍ സെയ്തലവി പൂളക്കാടും വെല്‍ഫെയര്‍ പാര്‍ട്ടിയുടെ സൗരിയത്ത് സുലൈമാനും അംഗമായപ്പോള്‍ ബി.ജെ.പിക്ക് എസ്.ആര്‍. ബാലസുബ്രഹ്മണ്യന്‍, നടേശന്‍ എന്നിവരെയാണ് വിജയിപ്പിക്കാനായത്. സി.പി.എമ്മിന് ഒരംഗമുണ്ട്. വിദ്യാഭ്യാസ സ്റ്റാന്‍ഡിങ് കമ്മിറ്റിയില്‍ യു.ഡി.എഫിന് നാലും എല്‍.ഡി.എഫിന് ഒന്നും അംഗങ്ങളുണ്ട്. പൊതുമരാമത്തില്‍ യു.ഡി.എഫിന് മൂന്നും സി.പി.എമ്മിന് രണ്ടും അംഗങ്ങളായി.