ഡെങ്കിപ്പനി: മണിയൂരിൽ പ്രതിരോധ പ്രവർത്തനം ഊർജിതമാക്കി

പയ്യോളി: മണിയൂർ പഞ്ചായത്തിലെ പതിയാരക്കര മാങ്ങിൽ കൈ, മുടപ്പിലാവിൽ, കരുവാണ്ടിമുക്ക് പ്രദേശങ്ങളിൽ ഡെങ്കിപ്പനി റിപ്പോർട്ട് ചെയ്ത സാഹചര്യത്തിൽ പ്രതിരോധ പ്രവർത്തനങ്ങൾ ഊർജിതമാക്കി. മണിയൂർ പ്രാഥമിക ആരോഗ്യ കേന്ദ്രത്തിൻെറ ആഭിമുഖ്യത്തിൽ രോഗബാധിത പ്രദേശങ്ങളിൽ ആരോഗ്യവകുപ്പ് ജീവനക്കാരും, ആശ പ്രവർത്തകരും ഉൾപ്പെട്ട സംഘം ഗൃഹസന്ദർശനം നടത്തി. ഉറവിട നശീകരണം, ബോധവത്കരണ നോട്ടീസ് വിതരണം, സ്പ്രേയിങ്, ഫോഗിങ്, ആരോഗ്യ ബോധവത്കരണ ക്ലാസുകൾ എന്നിവ സംഘടിപ്പിച്ചു. രോഗ പ്രതിരോധ പ്രവർത്തനങ്ങൾക്ക് കെ.കെ. ബാബു (എച്ച്.ഐ), പി.കെ. സുമതി, (പി.എച്ച്.എൻ) ജൂനിയർ ഹെൽത്ത് ഇൻസ്പെക്ടർമാരായ കെ. രാജേഷ്, വി. രാജീവൻ, വി.എസ്. റെജി, സി.കെ. ഷിൻറു, ജൂനിയർ പബ്ലിക് ഹെൽത്ത് നഴ്സുമാരായ കെ.കെ. മോളി, പി. രഞ്ചുഷ എന്നിവർ നേതൃത്വം നൽകി.