ആദിവാസി ഭൂമി കൈവശപ്പെടുത്തൽ: ഊരുകൂട്ടം പ്രക്ഷോഭത്തിലേക്ക്

നന്മണ്ട: പുക്കുന്നുമല, കോളിയോട് മല, കരിയാണിമല കൊള്ളടിമല പ്രദേശങ്ങളിലെ ആദിവാസി ഭൂമി, ഭൂമാഫിയ കൈവശപ്പെടുത്തി ക്രഷറും റോക്ക് പ്രൊഡക്ടും ആരംഭിക്കുന്നതിനുള്ള അണിയറ നീക്കങ്ങൾ ആരംഭിച്ചതായി ആദിവാസി സംഘടനകൾ ആരോപിച്ചു. ജൈവവൈവിധ്യങ്ങളുടെ കലവറയായ ഈ ഭൂമി നിരക്ഷരരായ ആദിവാസി കുടുംബങ്ങളെ പ്രലോഭിപ്പിച്ച് ഭൂമാഫിയ കൈവശപ്പെടുത്തുന്നുവെന്നാണ് ആദിവാസി സംഘടനകൾ പറയുന്നത്. ഭൂമാഫിയയുടെ മോഹന വാഗ്ദാനങ്ങളിൽ വീണ് പല കുടുംബങ്ങളും ഇതിനകംതന്നെ മലമുകളിൽനിന്ന് താഴേക്ക് ഇറങ്ങിത്തുടങ്ങി. തുച്ഛമായ വില കൊടുത്താണ് ഭൂമാഫിയ ഭൂമി വാങ്ങിക്കൂട്ടുന്നത്. കാവുകളും നീരുറവകളും ഈ മലകളെ സമ്പന്നമാക്കുന്നു. അപൂർവ ഇനം സസ്യങ്ങളുടെ വിളനിലമായ ഭൂമിയാണിത്. എക്കർകണക്കിന് വ്യാപിച്ചുകിടക്കുന്ന ഭൂമി ലക്ഷ്യംവെച്ചാണ് മാഫിയ മുന്നോട്ടുനീങ്ങുന്നത്. ആദിവാസികളിൽനിന്ന് മറ്റ് കുടുംബാംഗങ്ങൾ അറിയാതെയാണ് രേഖ കൈമാറ്റം അണിയറയിൽ നടക്കുന്നതെന്ന് പട്ടികവർഗ സംഘടന നേതാക്കൾ പറയുന്നു. ഇതിനകംതന്നെ അരിപ്പാറപുറം, വലിയകണ്ടി, അരിപ്പാൻതോട്, ഉപ്പൂത്തിക്കണ്ടി, വീട്ടിക്കൽ-മുട്ടച്ചിപ്പാറ എന്നീ ഭൂമികൾ കച്ചവടമാക്കിക്കഴിഞ്ഞുവെന്ന് ആദിവാസികൾ പറയുന്നു. ഭൂമാഫിയ ഭൂമി വാങ്ങിക്കൂട്ടുന്നതിനെതിരെ ആദിവാസി ഊരുകൂട്ടത്തിൻെറ നേതൃത്വത്തിൽ പ്രക്ഷോഭ പരിപാടികൾ ആരംഭിക്കുമെന്ന് അറിയിച്ചു.