നിർമാണച്ചട്ടം ലംഘിച്ച് കെട്ടിടം പണിതതായി പരാതി

പേരാമ്പ്ര: ടൗണിൽ ചേനോളി റോഡ് ജങ്ഷനിൽ കെട്ടിട നിർമാണച്ചട്ടം ലംഘിച്ച് കെട്ടിടം പണിതതായി ചൂണ്ടിക്കാണിച്ച് ഓംബു ഡ്സ്മാന് പരാതി നൽകി. 70 വർഷം പഴക്കമുള്ള പഴയ കെട്ടിടത്തി​െൻറ അതേ സ്ഥാനത്ത് പുതിയ രണ്ടുനില കെട്ടിടമാണ് ഉയർന്നിരിക്കുന്നത്. റോഡിൽനിന്ന് ഒരു മീറ്റർപോലും അകലം പാലിക്കാതെയാണ് കെട്ടിടം നിർമിച്ചതെന്ന് പടിഞ്ഞാറെ പറമ്പിൽ ഗോപിനാഥൻ നൽകിയ പരാതിയിൽ പറയുന്നു. കെട്ടിടത്തിന് ഗ്രാമപഞ്ചായത്ത് നമ്പറും നൽകിയിട്ടുണ്ട്. പരാതിക്കാരന് വിവരാവകാശ നിയമം വഴി പഞ്ചായത്തിൽനിന്ന് ലഭിച്ച രേഖയിൽ പറയുന്നത് കെട്ടിടം ബലപ്പെടുത്തിയതാണെന്നാണ്. കെട്ടിടം കണ്ടാൽ പുതിയത് നിർമിച്ചതാണെന്ന് ആർക്കും മനസ്സിലാവുമെന്നും പരാതിക്കാരൻ ചൂണ്ടിക്കാട്ടുന്നു. തറ നിലക്കും ഒന്നാം നിലക്കും മാത്രമേ കെട്ടിടത്തിന് നമ്പറുള്ളൂ. അതിനാൽ പ്ലാനിൽ കാണിച്ച രണ്ടാം നിലയുടെ നിർമാണാനുമതി റദ്ദ് ചെയ്തതായി ഗ്രാമപഞ്ചായത്ത് സെക്രട്ടറി അറിയിച്ചിട്ടുണ്ടെങ്കിലും ഇപ്പോൾ രണ്ടാം നിലയുടെ നിർമാണവും പൂർത്തിയായിരിക്കുകയാണ്.