അടിവാരത്ത് മാവോവാദി പോസ്​റ്ററുകൾ

ഈങ്ങാപ്പുഴ (കോഴിക്കോട്): പുതുപ്പാടി പഞ്ചായത്തിലെ അടിവാരത്ത് മാവോവാദി പോസ്റ്ററുകൾ. ചുരം ബൈപാസ് റോഡിൽ മുപ്പതേക്ര ജങ്ഷനിൽ ജനങ്ങൾ തിങ്ങിപ്പാർക്കുന്ന ഭാഗത്താണ് വ്യാഴാഴ്ച രാവിലെ പോസ്റ്ററുകൾ പ്രത്യക്ഷപ്പെട്ടത്. ''കേരളത്തിലുണ്ടായ പ്രളയത്തിന് കാരണക്കാരായ സാമ്രാജ്യത്വ ശക്തിയേയും ദല്ലാൾ മേധാവിത്വ മുതലാളിത്തത്തെയും പ്രകൃതിയെ കൊള്ളയടിക്കാൻ ഇവരെ പിന്താങ്ങുന്ന കേന്ദ്ര-സംസ്ഥാന സർക്കാറിനെ തള്ളിക്കളയാം. പുത്തൻ ജനാധിപത്യ വിപ്ലവത്തെ വിജയിപ്പിക്കാം..' എന്നിങ്ങനെയാണ് പോസ്റ്ററിലെ വരികൾ. ഇതോടൊപ്പം ജനകീയ വിമോചന ഗറില്ല സേന കബനി ദളത്തി​െൻറ വാർത്ത ബുള്ളറ്റിനായ 'കാട്ടുതീ'യുടെ താളുകളും പ്രദേശത്തുനിന്ന് കണ്ടെടുത്തു. 1989ലെ എസ്.സി, എസ്.ടി നിയമം ദുർബലപ്പെടുത്തിയ സുപ്രീംകോടതി ഉത്തരവ് ആദിവാസി-ദലിത് വിഭാഗങ്ങൾക്കെതിരായ കടന്നാക്രമണമാണ് എന്നതുൾെപ്പടെയുള്ള ലേഖനങ്ങൾ ഇതിലുണ്ട്. സി.പി.ഐ (മാവോയിസ്റ്റ്) കബനി ബ്രാഞ്ച് കമ്മിറ്റിയുടെ പേരിലാണ് പോസ്റ്ററുകൾ. താമരശ്ശേരി പൊലീസ് സ്ഥലത്തെത്തി ഇവ കസ്റ്റഡിയിലെടുത്തു.