ന്യൂനപക്ഷങ്ങള്‍ക്ക് വേണ്ടത്​ നിര്‍ഭയത്വം ^എം.ഐ. ഷാനവാസ്

ന്യൂനപക്ഷങ്ങള്‍ക്ക് വേണ്ടത് നിര്‍ഭയത്വം -എം.ഐ. ഷാനവാസ് കോഴിക്കോട്: നിര്‍ഭയമായി ജീവിക്കാനുള്ള അവകാശമാണ് ന്യൂനപക്ഷങ്ങള്‍ക്ക് വേണ്ടതെന്ന് എം.ഐ. ഷാനവാസ് എം.പി. മുസ്‌ലിം എംപ്ലോയിസ് കള്‍ചറല്‍ അസോസിയേഷന്‍ (മെക്ക) ആഭിമുഖ്യത്തില്‍ ജസ്റ്റിസ് രജീന്ദർ സച്ചാര്‍ അനുസ്മരണവും ന്യൂനപക്ഷ സമ്മേളനവും ഉദ്ഘാടനം ചെയ്യുകയായിരുന്നു അദ്ദേഹം. ഭരണഘടന പദവിയുടെ അത്യുന്നത സ്ഥാനങ്ങളിലിരിക്കുന്നവർവരെ വര്‍ഗീയമായി കാര്യങ്ങളെ സമീപിക്കുന്നത് ആപത്കരമാണ്. ന്യൂനപക്ഷ വിഭാഗം വലിയ വെല്ലുവിളികള്‍ നേരിടുന്നകാലത്ത് മുസ്‌ലിം സമുദായങ്ങളിൽ ഐക്യം അനിവാര്യമാണ്. സംഘടനകള്‍ അഭിപ്രായഭിന്നത മറന്ന് പൊതുവിഷയങ്ങളില്‍ ഒറ്റക്കെട്ടായി നിലകൊള്ളണം. ന്യൂനപക്ഷങ്ങളുടെ രാജ്യത്തെ അവസ്ഥ കൃത്യമായി അവതരിപ്പിച്ച ആധികാരിക രേഖയാണ് സച്ചാര്‍ കമീഷന്‍ റിപ്പോര്‍ട്ട്. റിപ്പോര്‍ട്ട് പൂര്‍ണമായി പ്രാവര്‍ത്തികമാക്കാനായില്ലെന്നും എം.ഐ. ഷാനവാസ് പറഞ്ഞു. സംസ്ഥാന പ്രസിഡൻറ് പ്രഫ. ഇ. അബ്ദുല്‍ റഷീദ് അധ്യക്ഷത വഹിച്ചു. പി.കെ. അബ്ദുറഹ്മാന്‍, ടി. ശാക്കിർ‍, നസ്റുദ്ദീന്‍ എളമരം, എൻജി. പി. മമ്മദ്‌കോയ, എന്‍.കെ. അലി, പി.കെ. ഉസ്മാന്‍കോയ, നൗഷാദ്, ഡോ.പി.ടി. സെയ്ദ്മുഹമ്മദ്, പി. അബൂബക്കര്‍ എന്നിവർ സംസാരിച്ചു.