കുടുംബശ്രീ ജില്ല കലോത്സവം: കൊയിലാണ്ടി താലൂക്ക് മുന്നേറുന്നു

കോഴിക്കോട്: കുടുംബശ്രീയുടെ 20ാം വാർഷികത്തോടനുബന്ധിച്ച് സംഘടിപ്പിക്കുന്ന ജില്ല മത്സരത്തിൽ കൊയിലാണ്ടി താലൂക്ക് മുന്നേറുന്നു. കോഴിക്കോട് നളന്ദ ഓഡിറ്റോറിയത്തിൽ രണ്ടു വേദികളിലായി 26 ഇനങ്ങളിലാണ് 'അരങ്ങ് 18' എന്ന പേരിൽ മത്സരങ്ങൾ നടക്കുന്നത്. ആറ് സ്റ്റേജിതര മത്സരങ്ങൾ ബാങ്ക് ഓഡിറ്റോറിയത്തിൽ നടന്നു. നിലവിൽ 60 പോയൻറുമായി കൊയിലാണ്ടി താലൂക്ക് മുന്നിട്ടുനിൽക്കുകയാണ്. എട്ടു ദിവസങ്ങളായി നടത്തിയ താലൂക്ക്തല മത്സരത്തിൽ വിജയികളായ കുടുംബശ്രീ അംഗങ്ങളും കുടുംബാംഗങ്ങളുമാണ് മത്സരത്തിലുള്ളത്. ഒപ്പന, സംഘനൃത്തം, മൈം, സ്കിറ്റ്, നാടകം, ശിങ്കാരിമേളം, കഥാപ്രസംഗം എന്നീ ഇനങ്ങളാണ് അവശേഷിക്കുന്നത്.