ചെങ്ങോടുമല ഖനനം അനുവദിക്കില്ല -സർവകക്ഷി യോഗം

കൂട്ടാലിട: കോട്ടൂർ ഗ്രാമപഞ്ചായത്തിലെ ചെങ്ങോടുമലയിൽ കരിങ്കൽ ഖനനം അനുവദിക്കില്ലെന്ന് നരയംകുളം രണ്ടാം വാർഡ് സർവകക്ഷി യോഗം തീരുമാനിച്ചു. പരിസ്ഥിതി ദുർബല പ്രദേശമായ ഇവിടെ ഖനനത്തിന് കളമൊരുക്കാൻ ജനങ്ങളെ ഭിന്നിപ്പിക്കുന്ന തന്ത്രമാണ് ക്വാറി മാഫിയ കൈക്കൊള്ളുന്നത്. ഇതിനെതിരെ ജനങ്ങൾ ജാഗ്രത പാലിക്കണമെന്ന് യോഗം അറിയിച്ചു. വാർഡ് അംഗം ടി.കെ. രഗിൻ ലാൽ അധ്യക്ഷത വഹിച്ചു. ഗ്രാമപഞ്ചായത്ത് വൈ. പ്രസിഡൻറ് കെ.കെ. ബാലൻ, സ്റ്റാൻഡിങ് കമ്മിറ്റി ചെയർമാൻ ഹമീദ്, ടി. ഷാജു, എ. ദിവാകരൻ നായർ, ടി.പി. രവീന്ദ്രൻ, വി.എ. രാജേഷ്, എം.കെ. സതീഷ്, ശ്രീലത ഉത്രാലയം, വി.വി. ജിനീഷ് എന്നിവർ സംസാരിച്ചു. ക്വാറിക്കെതിരെ സമരസമിതി രൂപവത്കരിച്ചു. രണ്ടാം വാർഡ് വിളിച്ചുചേർത്ത യോഗത്തിൽ മറ്റ് വാർഡുകളിലുള്ളവർ എത്തിയത് വാക്തർക്കത്തിനിടയാക്കി. തുടർന്ന് യോഗം നേരത്തെ നിശ്ചയിച്ച സ്ഥലത്തുനിന്നും മാറ്റുകയായിരുന്നു.