ആദിവാസി ഭൂമി സംരക്ഷിക്കണം -വെൽഫെയർ പാർട്ടി

പേരാമ്പ്ര: ചക്കിട്ടപാറ പഞ്ചായത്തിലെ മുതുകാട് സീതപാറയിലെ ആദിവാസികളുടെ ഭൂമിയിൽ അവരുടെ അനുവാദമില്ലാതെ വനം വകുപ്പ് നേതൃത്വത്തിൽ വനവത്കരണം നടത്തിയത് പ്രതിഷേധാർഹമാണെന്ന് വെൽഫെയർ പാർട്ടി പേരാമ്പ്ര നിയോജക മണ്ഡലം കമ്മിറ്റി അഭിപ്രായപ്പെട്ടു. വാസയോഗ്യമല്ലാത്ത ഭൂമി നൽകി അവരെ കബളിപ്പിച്ചതിനും പുറമെ ഇപ്പോൾ ഈ ഭൂമി തട്ടിയെടുക്കാനുള്ള ശ്രമമാണ് നടക്കുന്നതെന്നും പാർട്ടി ചൂണ്ടിക്കാട്ടി. ഇവിടെ ഭൂമി ലഭിച്ച 202 ആദിവാസി കുടുംബങ്ങളിൽ 197 കുടുംബങ്ങളും ജില്ലയിലെ വിവിധ കോളനികളിൽ നരകയാതന അനുഭവിക്കുകയാണ്. സീതപാറയിലെ ഭൂമി എല്ലാ അടിസ്ഥാന സൗകര്യവും ഒരുക്കി വാസയോഗ്യമാക്കി ഈ കുടുംബങ്ങളെ തിരിച്ചുകൊണ്ടുവരണമെന്നും പാർട്ടി ആവശ്യപ്പെട്ടു. വെൽഫെയർ പാർട്ടി ജില്ല ജോ. സെക്രട്ടറി ടി.കെ. മാധവൻ, മണ്ഡലം പ്രസിഡൻറ് എം.എം. മുഹ്യിദ്ദീൻ, ജനറൽ സെക്രട്ടറി അബ്ദുല്ല സൽമാൻ, എം.കെ. ഖാസിം എന്നിവർ സീതപാറ സന്ദർശിച്ചു.