പേരാമ്പ്ര താലൂക്കാശുപത്രിക്ക് ലിനിയുടെ പേര് നൽകാൻ സോഷ്യൽ മീഡിയയിൽ പ്രചാരണം

പേരാമ്പ്ര: ഗവ. താലൂക്കാശുപത്രി 'എയ്ഞ്ചൽ ലിനി മൊമ്മോറിയൽ ഗവ. താലൂക്കാശുപത്രി'എന്ന് പുനർനാമകരണം ചെയ്യണമെന്നാവശ്യപ്പെട്ട് സോഷ്യൽ മീഡിയയിൽ പ്രചാരണബഹളം. ആശുപത്രിയുടെ പേരുമാറ്റി എന്ന തരത്തിൽ വ്യാജ സന്ദേശങ്ങളും പ്രചരിക്കുന്നുണ്ട്. ഫേസ്ബുക്കിലും വാട്സ് ആപ്പിലുമെല്ലാം വ്യാഴാഴ്ച മുതൽ ഇത്തരം സന്ദേശങ്ങൾ പ്രവഹിക്കുകയാണ്. നിരവധിയാളുകളാണ് ഈ പോസ്റ്റ് ഷെയർ ചെയ്യുന്നത്. എന്നാൽ, ആശുപത്രിയുടെ പേരുമാറ്റുന്നതുമായി ബന്ധപ്പെട്ട് ആലോചനകൾപോലും നടന്നിട്ടില്ലെന്ന് അധികൃതർ പറയുന്നു. രോഗിയെ പരിചരിക്കുന്നതിനിടെ നിപ വൈറസ് ബാധയേറ്റ് മരിച്ച താലൂക്കാശുപത്രിയിലെ നഴ്സ് ലിനിയുടെ പേരിൽ ആശുപത്രി പുനർനാമകരണം ചെയ്യണമെന്നാവശ്യപ്പെട്ട് 'യൂത്ത് ഓഫ് പേരാമ്പ്ര' എന്ന പേരിൽ പേരാമ്പ്ര ടൗണിൽ ബോർഡ് സ്ഥാപിച്ചിരുന്നു.