റായ്​പുരിൽ സമരം ചെയ്​ത 600ലധികം നഴ്​സുമാരെ ജയിലിലടച്ചു

റായ്പുർ: ശമ്പള പരിഷ്കരണവും ഉദ്യോഗക്കയറ്റവും ആവശ്യപ്പെട്ട് രണ്ടാഴ്ചയായി സമരം ചെയ്യുന്ന 600ലധികം നഴ്സുമാരെ ഛത്തിസ്ഗഢിൽ അറസ്റ്റ് ചെയ്ത് ജയിലിൽ അടച്ചു. ജോലിക്ക് നിർബന്ധമായും കയറണമെന്ന സർക്കാർ ഉത്തരവ് ലംഘിച്ച് സമരം ചെയ്തതിനെ തുടർന്നാണ് നടപടി. മൊത്തം 607 പേരെയാണ് അറസ്റ്റ് ചെയ്തത്. എല്ലാവരെയും റായ്പുർ സെൻട്രൽ ജയിലിലേക്കാണ് അയച്ചത്. മേയ് 18 മുതലാണ് സംസ്ഥാനത്തെ സർക്കാർ ആശുപത്രികളിൽ ജോലി ചെയ്യുന്ന നഴ്സുമാർ സമരം തുടങ്ങിയത്. തുടർന്ന് മേയ് 28ന് സർക്കാർ സമരത്തിനെതിരെ അവശ്യസേവന പരിപാലന നിയമം (എസ്മ) പ്രയോഗിച്ചിരുന്നു.