കരിഞ്ചോല ഉരുള്‍പൊട്ടല്‍: കുട്ടികള്‍ക്ക് സാന്ത്വനമാകാന്‍ കലാസംഘമെത്തി

താമരശ്ശേരി: കട്ടിപ്പാറ കരിഞ്ചോല ഉരുള്‍പൊട്ടല്‍ ദുരിതബാധിത പ്രദേശങ്ങളിലെ കുട്ടികളുടെ ഭയാശങ്കകള്‍ മാറ്റാന്‍ അധ്യാപക കലാസംഘത്തി​െൻറ ഇടപെടല്‍ ശ്രദ്ധേയമായി. കോഴിക്കോട് ഡി.ഡി.ഇ ഇ.കെ. സുരേഷ് കുമാറി​െൻറ നേതൃത്വത്തിലാണ് വ്യാഴാഴ്ച കലാസംഘമെത്തിയത്. കുരുന്നു മനസ്സുകളിലെ ഭീതിയകറ്റുന്നതിന് വിവിധ കലാപ്രകടനങ്ങളാണ് കാഴ്ചവെച്ചത്. ഗാനാവതരണം, സാഹിത്യകാരന്‍ ബഷീറിനെ അനുസ്മരിച്ച് സ്‌കൂള്‍ അങ്കണത്തില്‍ മാങ്കോസ്റ്റിന്‍ തൈ നടൽ, ചിത്രരചന, പാട്ട്, കവിതാലാപനം, അഭിനയം, സയന്‍സ് മാജിക് എന്നിവ നടന്നു. ചിത്രകല അധ്യാപകർ ചിത്രം വരക്കുകയും വിദ്യാർഥികള്‍ കൈകള്‍ ചായത്തില്‍ മുക്കി കാന്‍വാസില്‍ കൈമുദ്ര പതിപ്പിക്കുകയും ചെയ്തു. വെട്ടിഒഴിഞ്ഞതോട്ടം ഗവ. എൽ.പി സ്‌കൂളിലും തൊട്ടടുത്ത യു.പി സ്‌കൂളിലും അസോസിയേഷന്‍ ഓഫ് ക്രിയേറ്റിവ് ടീച്ചേഴ്‌സി​െൻറ നേതൃത്വത്തില്‍ കലാപ്രകടനങ്ങള്‍ അരങ്ങേറി. ദയ ചാരിറ്റബ്ള്‍ ട്രസ്റ്റി​െൻറ സഹായത്തോടെ വിദ്യാര്‍ഥികള്‍ക്ക് മധുരപലഹാരങ്ങളും വിതരണം ചെയ്തു. റിട്ട. അധ്യാപകനായ ഭാസ്‌കരന്‍ പി.എം ചേരി അവതരിപ്പിച്ച പാവ മൊഴിയാട്ടം ശ്രദ്ധപിടിച്ചുപറ്റി. ബി.പി.ഒമാരായ വി.എം. മെഹറലി, സഹീര്‍, എം.ജി. ബല്‍രാജ്, സത്യനാഥന്‍, സത്യന്‍ മുദ്ര, പ്രദീപ് മുദ്ര, ഉസ്മാന്‍, സതീഷ്‌കുമാർ, സിഗ്‌നി ദേവരാജന്‍ എന്നിവര്‍ കലാപ്രകടനങ്ങള്‍ക്ക് നേതൃത്വം നല്‍കി.