കൈതപ്പൊയില്‍-കോടഞ്ചേരി-അഗസ്ത്യൻമുഴി റോഡ് നവീകരണം ടെന്‍ഡറായി

ഈങ്ങാപ്പുഴ: കൈതപ്പൊയിലില്‍നിന്ന് ആരംഭിച്ച് കോടഞ്ചേരി തിരുവമ്പാടി വഴി അഗസ്ത്യന്‍മുഴി വരെയുള്ള റോഡി‍​െൻറ നവീകരണ പ്രവൃത്തിക്കുള്ള ടെൻഡറായി. കോഴിക്കോട് നാഥ് കണ്‍സ്ട്രക്ഷന്‍സിനാണ് ടെന്‍ഡര്‍ ലഭിച്ചത്. 65.46 കോടി രൂപയാണ് പദ്ധതിയുടെ എസ്റ്റിമേറ്റ് തുക. ഇത്ര ദൂരം വരുന്ന റോഡ് ഒറ്റയടിക്ക് ആധുനിക രീതിയില്‍ നവീകരിക്കുന്നത് ജില്ലയില്‍ ആദ്യമാണ്. പദ്ധതിയുടെ പ്രവൃത്തി ഉദ്ഘാടനം ഈ മാസം ഒടുവിൽ നടക്കും. റോഡ് 10 മീറ്ററായി വര്‍ധിപ്പിക്കാന്‍ വേണ്ട അധിക ഭൂമി ജനങ്ങള്‍ പല സ്ഥലത്തും സൗജന്യമായി വിട്ടുനല്‍കുന്നതിനാല്‍ പൊളിക്കേണ്ടി വരുന്ന മതിലുകള്‍ കെട്ടിക്കൊടുക്കുന്നതാണ്. ഇതിനെല്ലാമുള്‍പ്പെടെ ഒരു കിലോമീറ്റര്‍ ദൂരം നവീകരിക്കാന്‍ നാലുകോടിയോളം രൂപയാണ് ചെലവുവരുന്നത്. പ്രവൃത്തി പൂര്‍ത്തിയാവുന്നതോടെ പ്രേദശത്തി‍​െൻറ മുഖച്ഛായതന്നെ മാറുമെന്നാണ് നാട്ടുകാരുടെ പ്രതീക്ഷ. റോഡ് നിർമാണത്തിന് കര്‍ശന വ്യവസ്ഥകളും നടപടികളും ഉണ്ടാകുമെന്ന് പൊതുമരാമത്ത് അധികൃതര്‍ പറഞ്ഞു. കേരള റോഡ് ഫണ്ട് ബോര്‍ഡാണ് കിഫ്ബി പദ്ധതികളുടെ എസ്.പി.വിയായി പ്രവര്‍ത്തിക്കുന്നത്. അവരുടേയും കിഫ്ബി അധികാരികളുടേയും കൃത്യമായ വിലയിരുത്തല്‍ ഈ പദ്ധതിക്കുണ്ടാകും. പൊതുമരാമത്ത് വകുപ്പ് ഈയിടെ പാസാക്കിയ ഗുണനിലവാര നിയന്ത്രണ മാനദണ്ഡങ്ങള്‍ കര്‍ശനമായി നടപ്പാക്കുമെന്നും പൊതുമരാമത്ത് അധികൃതര്‍ അറിയിച്ചു.