പേരാമ്പ്ര താലൂക്ക്​ ആശുപത്രി വാർഡിന് ലിനിയുടെ പേര് നൽകും

പേരാമ്പ്ര: താലൂക്ക് ആശുപത്രിയിൽ നിർമിക്കുന്ന പുതിയ വനിത വാർഡിന് നഴ്സ് ലിനിയുടെ പേര് നൽകുമെന്ന് മന്ത്രി ടി.പി. രാമകൃഷ്ണൻ. നിപ പ്രതിരോധ പ്രവർത്തകരെ ആദരിക്കുന്ന ചടങ്ങിലാണ് മന്ത്രി ഇക്കാര്യമറിയിച്ചത്. ആശുപത്രിക്ക് ലിനിയുടെ പേര് നൽകണമെന്ന് ആവശ്യമുയർന്നിരുന്നു. ചങ്ങരോത്ത്, പന്നിക്കോട്ടൂർ, പെരുവണ്ണാമൂഴി, മേപ്പയൂർ, കീഴരിയൂർ പി.എച്ച്.സികളെ കുടുംബാരോഗ്യ കേന്ദ്രമാക്കുമെന്നും മന്ത്രി പറഞ്ഞു. നിപ വൈറസ് ബാധയേറ്റ് മരിച്ചവരുടെ ആശ്രിതർക്ക് സർക്കാർ പ്രഖ്യാപിച്ച അഞ്ചുലക്ഷം ഉടൻ നൽകും. ലിനിയുടെ ഭർത്താവ് സജീഷിന് സർക്കാർ ജോലി നൽകാൻ നടപടി പൂർത്തിയായതായും രാമകൃഷ്ണൻ പറഞ്ഞു.